雅虎香港財經 【拉闊投資】買債收息也要冒險（小勇哥）
上次提到賣咗中銀飛機租賃（2588）債券，換馬至一間亞洲物流公司債券，可惜最終唔成功。呢間公司發5年期坡元債券，訂價5.1厘，但二手市場只買到5厘樓下，小勇轉吼3年期舊債，既係美元債，孳息又有5厘樓上，但問價問咗幾日，掹價好闊，報價低於5厘，最終小勇選擇等多陣，唔會將貨就價。
近日肺炎疫情殃及全球，股市氣氛極差，美國債成為資金避風塘，5年、10年、30年國債孳息齊創新低，10年得1.312厘，30年得1.798厘。諗住以收息債為核心資產嘅投資者，要越來越需要冒險，才找到像樣嘅回報。
現在連穩陣嘅歐美金融機構發永續債都唔駛6厘，之前大陸樓賣到，仲可以買內房債推高吓回報，但自從政策定調「房住不炒」，舊年中國經濟唔得，中央都唔放鬆調控，現在疫症爆發，三四線城市先可以放寬少少調控。
小勇膽小唔敢直接買內房債，只係買債券基金，等基金經理幫我揀，而且債基比公司債嘅入場費平好多，既可以博高啲回報，又可以用少啲錢，冒少啲風險，只要控制好槓桿比率便可以，唔好貪回報高而槓桿過多，借錢加碼。
雖然物流公司債券暫時買唔到，但小勇看好物流業前景，所以都會買物流股或物流REITs。隨住電商普及，物流業增長急速。今年肺炎疫情全球爆發，實體經濟霎時停頓，網上消費及服務卻不受影響。為了不讓疫情拖累全球經濟，各國將來的生產貨物及服務活動，一定網上網下同時兼顧，對物流需求只會越來越大。
物流業前景好買龍頭
買物流股，小勇都係揀龍頭，安全穩陣，坐得舒服。現時全球電商物流最大市場是中國、美國及印度。亞洲第三方物流管理商五強分別是：普洛斯（GLP）、嘉民集團（Goodman）、ESR、安博（Prologis）及豐樹物流信託（Mapletree Logistic Trust）。
普洛斯17年畀中國財團私有化咗，另外四間都有上市。嘉民喺澳洲最大，安博喺美國最大，ESR同豐樹係新加坡龍頭。香港最易接觸到嘅係ESR（1821），公司舊年先上市，小勇想買嘅債券就係呢間公司。
小勇哥
Yahoo Money Talk客席主持、投資達人
本欄逢周四刊出
