雅虎香港財經 操盤手札記│北水經「ETF通」間接掃阿里（割柑人）
上周，充滿離別！無論本地、外地，有人離任、有人離世。先講外地，上周四，英國首相約翰遜（Boris Johnson）喺超過50名官員辭職逼宮下，宣布辭任保守黨黨魁，留任看守首相至選出繼任者；上周五，日本前首相安倍晉三喺奈良街頭為自民黨站台拉票時，遇襲中槍，不治身亡。至於本地，上周五證監會公布，行政總裁歐達禮（Ashley Alder）年底提早離任；另外，上周初則有著名作家倪匡繼名導演羅啟銳之後，亦告離世。
美股、外匯、加密貨幣免費即時報價，自選投資組合獲取相關新聞提示。
英國、日本政壇地震，震動市場。先睇英國股滙市場，約翰遜下台化解政治危機，富時100指數上周四升1.1%，翌日再升0.1%；英鎊兌美元上周四反彈至1.2樓上，升0.8%，翌日再升0.1%。至於日本股滙市場，安倍中槍觸動避險情緒，日經225指數上周五由早市升近400點，回至收市只升26點或0.1%；避險資金流入日圓，日圓由早段跌見136.58兌1美元，一度倒升見135.33兌1美元，收136.08。
證監會歐達禮 年底提早離任
不過，英國即使換揆，但喺通脹、加息下，經濟衰退風險增加，而喺處理罷工、以至歐盟貿易關係上，更可能令風險加劇。經濟困局難以解決，股滙反彈難免短暫。日本方面，安倍係日本央行寬鬆政策嘅最有力支持者，市場以往視日央行無法加息因安倍影響力太大，如今政策或會調整。日圓逆流保持零息，成為套息交易主要借出貨幣，如果轉勢，金融市場將更波動。
本港市場最相關嘅係歐達禮告別證監會。歐達禮自2011年10月起出任證監會行政總裁，四度續約，原定明年9月任滿，因明年1月過檔英國金融行為監管局（FCA）而提早年底離任。佢以「打大老虎」著稱，又嚴打「啤殼」同「老千股」。佢喺2019年證監會30周年酒會致辭時憶述，早年有間具影響力嘅公司向證監會施壓，要求修改上市規則以符合其利益，更有同事被召去禮賓府，但證監會並無屈服。事件矛頭，直指阿里巴巴（9988），是耶非耶，無從證實。
ETF通首周 北水九成買3033
話時話，踏入7月，阿里巴巴上周股價拾級而上，期間13間券商對其發表報告，全部給予「買入」或「跑贏大市」評級。券商普遍預測，阿里上季收入按年錄得低單位數跌幅，但喺嚴控成本下，盈利或有驚喜。根據彭博綜合券商預測，阿里上季經調整盈利按年減少37%，今季減幅收窄至2%，下季則重拾增長5%。除咗券商唱好，7月4日開通嘅「ETF通」亦利好阿里。
「ETF通」有4隻本港上市ETF，包括盈富基金（2800）、恒生中國企業（2828）、南方恒生科技（3033）、安碩恒生科技（3067），換言之，北水可藉買入上述ETF而買到未能直接買入嘅第二上市股份如阿里。截至上周五，阿里分別佔上述ETF 7.92%、9.18%、9.37%、9.06%。睇首周成績表，北水買入上述ETF貨值共1.44億元，3033佔1.29億元，佔比近九成，阿里間接受惠。阿里上周五升3.7%，報121元，但阿里美股先升後跌，低水2%。策略上，可候110元樓下分注收集，中線上望1月高位135元。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
