雅虎香港財經 操盤手札記│外圍資金掃中概股（割柑人）
首次回應！上周四，中國國家主席習近平同到訪北京嘅歐盟理事會主席Charles Michel會談，據《華爾街日報》披露，習首次對近期中國出現嘅反封控抗議活動作出回應，習指事件反映民眾對疫情爆發3年嚟實施嘅清零政策感到沮喪，又指Omicron致死率低過Delta，釋出防疫可能鬆綁訊號。雖然《新華社》新聞稿並未提及，但有表示雙方討論公共衛生問題。事實上，除咗社會壓力，中國PMI數據疲弱，亦促使國家加快復常步伐。
美股外幣即時報價 多國新聞任睇
中國上周三公布嘅11月製造業PMI跌至48，按月跌1.2個百分點，連續兩個月低過50盛衰分界線，亦係7個月最低；非製造業PMI跌至46.7；綜合PMI跌至47.1，反映防疫措施導致工人無法返崗，企業生產經營活動受限。上周四公布嘅11月財新製造業PMI雖然由10月嘅49.2回升至49.4，但仍低過50，而且就業指數跌至2020年3月以嚟最低，但購進價格指數連續兩個月高過50，反映企業銷售放緩、利潤下降或比整體指數所示更差。
炒作防疫鬆綁 觀望中央會議
中國PMI數據處於50以下收縮區，經濟下行壓力加大，防疫政策係決定短期經濟走向嘅關鍵，近日已見一系列防疫鬆綁措施同貨幣刺激措施出台，市場正在觀望人民銀行會否繼降準後再行減息，喺本月進一步放寬中期借貸便利（MLF）操作，以及下調貸款市場報價利率（LPR）。另外，市場亦觀望將於年底召開嘅政治局會議同中央經濟工作會議，有關明年經濟計劃同方向嘅指引。
外圍方面，美國上周五公布嘅11月非農就業數據強勁，市場擔心聯儲局堅持緊縮政策，就算本月加息幅度放緩，但最終利率未必喺先前預期嘅5厘見頂，美股先跌後喘定，道指收市升0.1%、標指跌0.1%、納指跌0.2%。外圍資金炒作中國防疫鬆綁，掃中概股，金龍中國指數飆升5.4%；港股ADR比例指數高水404點或2.2%，收復19000關；中槪科網股受熱捧，KraneShares CSI 中國互聯網ETF（KWEB）漲6.3%，ATMJ美國股價亦分別較香港高3.4%、3.4%、4.9%、5.2%。
聖誕鐘買滙豐 舊調或可重彈
恒指由上周一低位16833升至上周四高位19237，累升2,404點或14.3%，升至逼近2021年6月以嚟嘅下降軌受阻而回，上周五收報18675，回吐0.3%，大市成交額縮減至1,427億元，大漲小回格局。中期嚟講，11月以嚟嘅反彈趨勢未變，完成短期調整後可望突破下降軌，挑戰8月初阻力20300水平，甚至50周線阻力（現處20597）；下方首個支持為100天線（現處18382），下個支持為20天線（現處17626）。
港股本周初可望延續反彈行情，然後回氣再上，若回氣至100天線，不妨炒番轉，可吼ATMJ，因ATMJ喺恒指同國指權重較高，係大市上升不可缺少嘅動力。另外，喺恒指權重達7.95%嘅滙豐（005）亦可吼，集團上周二晚公布，出售加拿大業務予加拿大皇家銀行，2023年底完成交易，將帶來57億美元除稅前利潤，考慮2024年以派息、回購回饋股東。「聖誕鐘、買滙豐」嘅舊調，今年或可重彈。該股現時守升軌之上，可小注吸納，下破升軌則止蝕。
割柑人
www.fb.com/hkstockpicker
本欄逢周一刊出
