收息股|新手入門 必睇幾個數據
市場上咁多隻股票都派息,係咪隻隻收息股都買得過?長揸優質藍籌股係咪就一定可以「躺平」收息?買收息股要留意啲咩?股息點樣計?乜嘢係「除淨日」、「派發日」、「股息率」、「派息比率」?點樣先可以做到「財息兼收」?今日就先同大家講啲入門嘢,認識收息股嘅幾項必睇數據:
「股息」點樣計?
上市公司如派發股息,通常會喺業績公布時一併宣布,例如煤氣喺3月21日公布業績時,就宣布派發末期股息每股0.23元,假設手持一手即1,000股煤氣,即可收取:0.23元 × 1,000 = 230元股息。除每年嘅末期股息,部分上市公司會喺公布中期或季度業績時宣布派發「中期股息」。部分公司甚至會因為一啲特別原因宣布派發「特別股息」,呢部分我哋容後再談。
「股息率」:反映買呢隻股嘅股息回報
A公司每年派息0.1元,B公司每年派息0.2元,係咪就等如買B收息回報高過買A?呢個時候,就要睇埋要用幾多錢買兩間公司嘅股票。
股息率 = (每年每股股息 ÷ 每股股價) x 100%
如果用每股股價1元就可以買到A公司股票,咁每年收息0.1元,買入A公司股票嘅股息率就會係 (0.1 ÷ 1) × 100% = 10%;如果用每股股價4元買入B公司股票,每年收息0.2元,買入B公司股票嘅股息率就會係 (0.2 ÷ 4) × 100% = 5%。由此可見,A公司10厘嘅股息回報高過B公司嘅5厘,要睇一間公司嘅股息回報,記得間公司嘅股價亦都係好重要!
派息率 ≠ 股息率
除咗股息率,大家亦有可能聽過「派息率」呢個term,但千祈唔好撈亂!
派息率 = ( 當年派息總數 ÷ 同年總盈利 )
反映一間公司對股東係咪好疏爽、係咪好願意派錢俾股東,至於「股息率」就關乎投資者切身嘅回報高低,兩者表達嘅嘢係唔同㗎!
除淨日、派發日
上市公司公布業績派息時,仲會宣布「除淨日」同「股息派發日」,呢兩個日子對「收息之徒」好重要!收唔收到息就睇呢兩日。如果投資者在「除淨日」前一日仍然持有該上市公司嘅股票,就可以喺「派發日」收到該數量股票應得嘅股息;如果喺「除淨日」或之後才買入該公司股票,就不能收到該期股息。
例如煤氣3月21日宣布派發0.23元末期股息,除淨日為6月8日,派發日為6月22日:咁投資者只要喺6月7日都仍然持有煤氣,例如一手1,000股,咁投資者喺6月22日就可以收到230元股息啦!相反,如果投資者喺6月7日或以前沽出,就不能收取股息了。
代收股息費
透過銀行或證券行投資股票收取股息,或會被收取「代收股息費」或「存倉費」,通常為股息金額嘅0.5%,或最低約30元。所以要計計數,如果收取股息金額唔多、七除八扣,實際股息收入可能就所餘無幾。
延伸閱讀: