日本相機廠商節節敗退?
日前有一單不太起眼新聞引起部分相機友注意,就係日本光學大廠奧林巴斯公布以300億日圓出售生產數碼相機的內地子公司。這單新聞引出一個關於日本相機廠商的疑團:唔願做舜宇光學係咪商業上一大失策?
2010年係日本相機大廠的豐收年,當年數碼相機出貨量衝上1.21億部高峰。不過這一年IG誕生,4G技術極速普及,其實已為手機威脅相機地位舖路。當手機進化為可以拍淺景深的雙鏡頭,加上超強功能的美顏App,便極速蠶食無反及中階相機市場。擁有「自拍神器」護城河的Casio今年就宣布退出輕便相機市場,曾聘用1.5萬名員工的奧林巴斯深圳廠房亦宣布停廠停工,現在更索性賣走內地生產相機業務。反映手機拍攝功能全面強化下,日本相機廠商確實節節敗退。
當然Olympus早已經是一間醫療設備大廠了,該部份的營收佔比高達近8成,也許對Olympus來說,生產數碼相機在世界大潮之下更顯雞肋。
如果時光可回帶,日本廠商在2010年在相機賣得優勢下,全力開拓手機鏡頭市場的話,這塊大餅就不會拱手相讓予舜宇光學等手機鏡頭大廠。當然在相機大廠管理層立場,做手機鏡頭未免係自己打自己,但開多一個高增長戰線,拉上補下始終有賺。在多間日本相機大廠中,唯一例外只有Sony,現時全球有四成手機內置相機CMOS都由Sony生產,令這項業務成為Sony重要的增長動力。
現在連高端手機銷量都見頂,日本相機大廠想分手機鏡頭塊餅已有點遲,唯有放棄輕便相機市場兼縮皮,另外就係學Apple般以高價策略賺盡高端用家的錢,所以今年Canon及Nikon兩間大廠都面對現實推出全片幅無反相機及相關的貴價鏡頭系列,Canon更行多一步進軍盈利可觀的醫療設備市場。
睇個勢未來數年會像菲林過渡到數碼時代般,細廠會頂唔住而停產兼出售相機業務,我們就有機會見到一些熟悉的相機品牌、但實情係生產自唔多出名的內地或東南亞企業的「翻生相機」了。
===============
財經精選資訊網站「中環街市」 臉書粉絲頁