星美系疑似爆煲？TVB減人縮皮都無用

大台TVB近來形勢大好，《延禧攻略》引爆追看潮，早前公布的中期業績純利回升至2.01億元。行政總裁李寶安亦順便派發「喜訊」，TVB會繼續努力裁員瘦身，料年底前再減不多於5%人手，即再Cut二百人。Cut人對員工係惡夢，但對TVB股東來說，減人縮皮，有助大台可以繼續穩派股息，當然係好消息。

正當大家以為大台最壞時刻已成過去時，忽然驚傳一單「拆大台」消息，涉事核心人物正是北京頂級夜總會「天上人間」前老闆覃輝。話說覃輝名下的星美系近日疑似爆煲，按星美控股公告，集團收到多名人士追數追息通知，集團更有四名董事跳船，明顯釋出「唔掂」訊號。而大台母企電視廣播，卻揸住一批星美控股可換股債券(CB)，當初認購金額達6.52億元，年利率為7.5%。從投資角度看，債息確係和味，但現在就面對賺息不能兼要撇帳的風險。

北京頂級夜總會「天上人間」前老闆覃輝名下星美系近日疑似爆煲。

6.52億元聽起來唔係大數目，似乎對電視廣播只係有限錢，但今時唔同往日，大台要幾經努力才賺到2.01億元利錢，中期業績收入亦只有22.31億元，如果這條爛帳入數，大台即使大手加碼縮皮Cut人亦未必夠填這條數。對一心賺高息繼續揸大台股票的散戶來說，這確實是一個黑天鵝級的消息。

或許會有人問，何解大台當初會大手押注星美控股的CB，高息固然係誘因，另一原因係大台轉莊後一直想進軍電影業，曾經擁有強勁戲院網絡的星美系，似乎係一個值得投資的盟友，豈料星美的戲院王國竟然是如此脆弱不堪。如此峰迴路轉的劇情，相信連擅長製作劇集的大台管理層都會感慨:「我估到個開頭，但係就估唔到，竟然唔係BBQ結局」。

===============

財經精選資訊網站「中環街市」 臉書粉絲頁