最新研究:金融及地產業 無參與消除貧窮
話說世界上有好多唔同指標,去量度社會發展同人類幸福,其中一個,就係2016年聯合國提出嘅SDGs,亦即係「可持續發展目標」(Sustainable Development Goals),畀班國際大孖沙參考,喂你做生意之餘,可以點樣於不同方面推動社會發展,最好喺2030年達標。
目標有好多,大項入面又有細項,筆者舉幾個比較常見嘅,分別係性別平等、消除貧窮、氣候行動、體面工作與經濟增長等等,其中體面工作,就係大家經常聽到嘅充份就業,同工同酬,人人返工都唔會覺得屈辱等等,如果你返工對住老細覺得自己低聲下氣,咁其實呢個社會,已經唔多達標。
2030年目標,國際企業都算重視,上年全球100大藍籌企業,已經有82%喺年報入面,公布推動目標,無論你睇PwC抑或KPMG嘅研究,都睇得出不同行業早已參與其中。
不過香港,就似乎無乜目標。
近期樂施會做咗個《兩岸三地藍籌企業參與狀況》研究,顯示50間香港企業中,只有8間公司有參與推動SDGs,而金融及地產業更加係無一間公司參與。樂施會認為本港企業,普遍對貧窮議題冷淡,建議政府應該以身作則,主動實行參與推動SDGs(最近外判清潔工罷工,就知道政府真係無「目標」)。據了解,樂施會未來會就研究同港交所洽商,睇可唔可以令上市公司更加透明,有無社會道德,都無所遁形。
[caption id="attachment_34126" align="aligncenter" width="639"]
Members of Oxfam dressed as the G7 leaders protest in Quebec City on June 9, 2018, during the G7 Summit. (Getty Images)[/caption] [caption id="attachment_34124" align="aligncenter" width="638"]
.[/caption]
但問題係,生意佬使唔使幫你消除貧窮呢?原來國際趨勢,有部份人係認為有需要嘅,睇大家叫唔好學高盛就知道(同特朗普集團、富國銀行等,齊齊排入美國企業聲譽排行榜倒數10名);反而被譽為「美國商界良心」嘅巴菲特,就永遠唔愁,生意同社會一齊「可持續發展」。
功利啲講,當「道德」成為了市場上其中一股力量,守護「道德」,會唔會就可以winwin?講返轉頭,作為小股民,你又會唔會買一隻「不道德的股票」?
===============
財經精選資訊網站「中環街市」 臉書粉絲頁