林鄭引爆炒工廈熱潮2.0 波叔有機
林鄭發表施政報告,其中一項吸睛建議係再推「活化工廈」政策,不過今次主題係將工廈用來住。此建議一出,睇來會引爆工廈熱潮2.0。
大家一直深信政府係最唔想樓市崩盤的「持份者」,所以新一份施政報告圍繞土地資源的措施,某程度上都有救市意味。例如把政府地興建公營房屋比例增至七成,即是大手筆縮小私樓土地供應,某程度上係幫助發展商爭取時間及空間推售手上的存貨。
不過更富想像空間係重推「活化工廈」政策,過去數年疑似可以居住的工廈翻新項目在各區湧現,不時有分析提醒買家入手這類單位要留心規管風險。想不到新一份施政報告建議容許改裝整棟工廈作為過渡性房屋之用,睇怕有機會掀起新一波工廈炒風。
雖然二手樓出現劈價潮,但市場對就腳的住宅租盤需求仍然強勁。如果工廈可以明正言順改建為服務式「住宅」,即使是過渡式房屋,但整棟工廈拆卸或再改建要闖很多關,所謂過渡式可能涉及六、七年,中間的租金收入便相當和味。
一旦落實新政策,揸重工廈的老牌家族如楊耀松家族,又或積極吸納工廈物業的恆地固然是大贏家,還有一名黑馬不能忽視。便是由舖位積極轉戰工廈的鄧成波,原來波叔早在今年年頭已建議政府容許工廈改建過渡式出租房屋,可見他早已對這類計劃有一定研究。所以政策推行後,手頭有工廈又熱定身的波叔,睇來都可以搶佔先機吧。
只是未知早前公開表示「對759有興趣」的零食店優品360°老闆林子峰,會否由領展車位和舖位,全面轉戰工廈呢?
至於散戶,到時組隊吸納舊式工廈單位,勝算亦分分鐘較勇武撈騰訊大,這個市場值得大家留意了。
===============
財經精選資訊網站「中環街市」 臉書粉絲頁