樓市專家｜中原施永青：今年樓價年尾高過年頭 惟最多追返去年50%至70%

中原集團創辦人施永青日前在電視節目表達樓市見底論，指出未來呈U型反彈，今日他在新春團拜被追問樓市走勢，他補充：「短期低位見咗，中長期趨勢有待觀察。今年會是一個上升年，年尾價會高過年頭價，但追唔到去年個跌幅，好嘅話，追返5至7成。」

施永青說：「咩時候可以超越小陽春，升市可以持續？就是有新客。搵開樓嘅人，由唔夠膽落搭到落搭，令到平盤有輕微上升。如果單靠呢班人，個市唔升得幾耐。咩時候可以有個市增長力？經濟好，職位增加，公司業績上升，經濟可以支持準買家，樓市就會持續。呢樣嘢要第二、三季先睇到，要睇實體經濟。」他續稱，現在消息有利樓市上升，實際則未曾見到。

那麼今年樓價升多少？他回應：「有一些負面影響，例如去全化球、中美磨擦，都令香港價值受影響。呢個有待中國外交上與世界修好能力。另外出口係咪真係平過人，等啲人由唔幫襯你都要幫襯你，呢個有待觀察。」

中原集團行政總裁施俊嶸指，踏入兔年，樓市全面復常，今年的新春團拜場面熱鬧，獲各大發展商支持，對樓市亦是一個強烈訊號，買家置業信心轉強，市場購買力回歸，發展商各大新項目蓄勢待發，樓市勢將轉旺。他補充，中原地產網站銀行估價查詢量，由過去半年的低位反彈1倍，對比旺市高位仍有1倍上升空間，絕對有力再上。隨着樓市極速轉活，公司亦決定未來積極增聘人手及增加廣告量。