【涼薄言論】承受唔到唔好做護士?
前線醫護人員壓力爆煲,有公立醫院男護士凌晨突然猝死家中,死因雖然仍有待調查,但有指是因為工作壓力大「追更」所致,加上有護士地獄更表曝光,從而引起打工仔熱烈討論,到底護士呢份工有幾辛苦?
該更表關鍵是下午2時收工後,當晚又要返多個通宵,俗稱「PAN三日更」;小編睇完都打了冷顫,不過有打工仔睇完「奪命更表」,就話護士以更表論唔算最辛苦,羅列出空姐、消防員等工作,認為「消防都要直踩」,其實「行行皆辛苦」,仲話護士因為係明星行業,所以先有咁多人關注。
有打工仔討論,認為以下工作,辛苦程度不輸護士﹗
做隧道工人,一日返14個鐘以上
巴士司機一開車就無得停,開到瞓著仲危險
空姐要追更,又要洗廁所
紀律部隊好多要on call
Big4 OT同樣慘無人道
地盤工搵命搏,但好少人會去關注
護士要應付病人,sales同樣要應付西客
今朝網上見到好多涼薄言論,有人甚至話,行行都係做十幾個鐘,「自己承受唔到,就唔好入行…」云云。
小編覺得,香港向來都係工時(長)第一,日返12個鐘係等閒事,用更表去講,的確好多行業都唔會比護士易做,但唔代表辛苦合理。
而且,護士份工同紀律部隊唔同,紀律部隊係on call,但護士做到無停,性質完全唔同。
有人話「護士扮可憐」,小編唔明香港人幾時變得咁涼薄?
小編想同嗰位打工仔講,今日如果你覺得護士辛苦好合理,其實他朝君體也相同,到你壓力爆煲時,其他人都可以話你「有咩咁辛苦」,最後邊個最開心?就係一班永遠唔使解決問題嘅「膠層」。
討論來源:香討
===================
19網輕鬆爆料熱線,歡迎舉報老細同事19惡行,立即click入去講畀我哋知啦