雅虎香港財經 
游學修package已經好過劉鳴煒？
最近《試當真》good show，創辦人游學修「一人創作」九展騷成為佳話，另邊廂劉鳴煒參與的海洋公園卻轉盈為虧，有網民重貼2016年港台節目《我係乜乜乜》的「男神選舉」，揶揄「優質股」劉鳴煒個package，好似已經唔夠吸引。
話說當年該節目著一班香港女士選出「男神」，未見樣前大部分選游學修，兩男士現真身後，女士卻棄游學修而去，轉軚選劉鳴煒，覺得劉鳴煒「個package好好」、「好有自信」，有女士質疑，如果追夢想「多少年後我才能結婚」，仲叫游學修「現實啲」，「我25歲都會唔會揀嗰個」，當時游學修回應過一句「我發起上來可以好發，你睇住嚟」。
美股、外匯、加密貨幣免費即時報價，自選投資組合獲取相關新聞提示
如果劉鳴煒係滙豐
優質股、龍頭股箇然好，但傳統優質股似乎已經唔係大市趨勢，呢兩年浪花淘盡英雄，無數龍頭股墜落凡間，以前滙豐派息唔係新聞，今日就連「考慮派息」都要令人忐忑不安，如果隻優質股係滙豐，女士要成日擔心有冇家用，俾幾多家用又要問過阿爸，女士們上唔上架車真係見智見仁。如果隻優質股係阿里巴巴，阿爸睇得幾嚴、准你用幾多身家又係一個問題，女士稍一不慎做咗「螞蟻」被取消IPO就血本無歸。
險「破產」唔係包袱
2016年時有評論話游學修係「潛力股」。雖然游學修自爆去年曾經無錢交租，當時要問公司借糧，到今日都要慳住使，但以「潛力股」來講最緊要市場面向，創辦人魄力同埋理念係咪有機會實現。Elon Musk都試過兩次爭啲破產，租都要問人借錢交，而Jeff Bezos都曾經被《巴倫》報道笑佢隨時破產，前中國首富恒大許家印甚至去畢過屎，「險破產」似乎唔係包袱而係「加冕」。
股價隨時硬過劉鳴煒
況且呢幾年女士轉搵「潛力股」係相當正路，個世界已經夠多風險，承受下風險又無太多嘢可以輸，而最緊要係逆／疫市中同妳一齊捱上去，做對「賭命夫妻」，長遠個股價隨時硬過劉鳴煒呢類「優質股」。
留意散戶會唔會「係咁先啦」
「潛力股」仲要睇係唔係MEME股，同埋咩人支持，面向市場到底有幾大，散戶會唔會經常「係咁先啦」。MEME股有時一炒就散，大上大落，之不過見到《試當真》認真毛堅認真，「一周年現場版」有古天樂出現；隔個海，游學修又有一種影圈老前輩的神秘力量「加持」，呢隻「潛力股」應該穩了。餘下問題，就剩返《試當真》會唔會好似《100毛》咁發展到上市⋯
相關報道：
