雅虎香港財經 【移居澳洲】澳洲租屋有乜選擇？租樓流程係點？
移居澳洲唔少人會先選擇租屋住，究竟租屋有乜選擇、流程係點、有乜細節要留意？
租盤類型選擇
揀租盤，第一步係了解一下租盤類型。大家印象中唔少澳洲人假日時都會在家中花園BBQ，想體驗假日BBQ就要租House住。澳洲House一般係一至兩層平房，設有獨立花園，品質最佳係磚建成的House，堅固又冬暖夏涼。至於木製House租金平但夏天較熱冬天較凍，亦較易有蚊蟲入屋問題。
另一較常見係聯排別墅Townhouse，一般為兩層，一樓係廚房、洗手間、起居室或客廳，二樓係睡房及浴室。Townhouse雖然花園較細，但樓底較高，通風及視野都唔錯。
小家庭在大城市落腳會傾向選擇Apartment，Apartment至少為三層以上住宅大廈，每層有多個單位，大廈內部通常會提供洗衣房，部分甚至會有健身室、泳池等康樂設施。至於Unit算係入門版Apartment，一般為二至三層，不設康樂設施，樓齡較舊的Unit像唐樓要行樓梯，樓齡較新會提供電梯。
租屋都有旺淡季
搵租盤最直接途徑係地產網站，澳洲搵盤最常用三個網站係RealEstate.com、Domain.com及Rent.com。RealEstate.com除提供租盤搜尋服務，亦提供搜尋中介服務，甚至尋找室友夾錢租屋服務。Domain.com優勢係搜尋條件夠精準，可選擇停車位、免按金、自設Keyword等進階搜尋功能。Rent.com專注於租盤服務，並提供信用評級查詢、按金借貸、租金付款等額外服務。
要留意係熱門地區租屋有旺淡季之分，例如悉尼冬天（六月至八月）係淡季，而達爾文濕季（Wet Season）（十月至四月）亦係淡季。淡季好處係少租客爭租盤選擇較多，不過凍或濕天氣就較難捱。
澳洲唔少業主會將自己間屋房間分租出去，但要留意這類租盤未必會提供租約，原因係業主想避稅。既然你唔係留學生，不論你係夫婦二人或三、四人小家庭，最好都係避開呢類租盤，並搵中介幫手搵租盤，確保租樓有認可租約。皆因日後申請永居須提交有效住址證明，有租約在手就方便申請。
租屋流程
澳洲中介通常唔太會遷就租客睇樓時間，當然如果你剛到埗未返工，時間上就較容易就。一如其他地區網上睇盤同現場環境不時有出入，睇盤時最好揀日頭方便望真居室情況，亦要留意周邊環境如交通、治安等。睇樓時亦要問清楚租金是否包括水、電及網絡，以及最快可入住日期。
揀啱租盤後須填寫租屋申請表，表格要求你填寫工作、收入證明及擔保人資料，假如未開工，最簡單方法係出示存款紀錄顯示有足夠財力支付一年租金亦可達標。至於擔保人最好係當區的永久居民，所以事先最好問定已移居當地親友幫手。
遞交申請表後通常一日內就知得唔得，成功租到就要簽約及支付按金。要留意部份租約會要求退租時搵專業清潔進行大掃除（Bond Clean）及提供收據作證明。所以簽約時最好留心這類條款。提交租約時一般要支付頭兩星期租及相當於四星期租金按金，亦要切記保存好按金收據。
入伙時亦要填寫房屋狀況報告（Condition Report），記錄你入伙時房屋詳細情況，退租時業主會按報告比對房屋狀況，有出入就可能要扣按金。所以填寫時要小心留意房屋細節並影相紀錄。退租前除了進行大掃除，亦要約中介或業主驗樓（Final Inspection），有過來人提醒最好準備定各類清潔用品方便按中介或業主要求即場清潔，如房屋狀況無問題就會退還按金。
伸延閱讀：
