雅虎香港財經 焦點美股│AMC爆升靠送爆谷！同中港兩地都有淵源？
「網紅股」AMC（AMC）單日爆升近100%，再次成為市場焦點。AMC強勢彈起，關鍵竟然係爆谷，呢間公司仲同中港兩地有啲淵源。
美股、外匯、加密貨幣免費即時報價，自選投資組合獲取相關新聞提示。
曾經係新東人睇戲「救星」+成就王建林影業夢
唔少新界人對AMC應該仲有印象，皆因在1998年AMC進駐又一城，AMC又一城開業時以多達11間放影院為賣點。當年新界東戲院奇缺，唔去沙田UA，AMC又一城就幾乎係唯一選擇。AMC又一城另一集體回憶係引入更多花款美食，其中栗米片加芝士醬更成為爆谷以外熱門選擇。AMC又一城另一特色係放映前會播放電影冷知識，這一招令幫襯開的戲迷印象深刻。
至於AMC與內地淵源就與王建林萬達集團有關，王建林曾銳意實現其影業夢，既收購美國傳奇影業，並在2012年投資7億美元投資AMC母企。到2013年AMC上市後，萬達持股曾升值逾倍，雖然後來多次受發債、配股令萬持持股被稀釋至23.08%，然而仍保住大股東地位。但最大考驗係疫情來襲，戲院成為停擺重災區，AMC去年更數次傳出破產消息，一旦成事萬達的投資將歸零，AMC股價亦跌至低殘，更成為沽空機構狙擊目標。
散戶成大戶 AMC管理策略大變
捱過2020年疫情，AMC在今年初股價插至2美元水平。意想不到係由GameStop（GME）引發的散戶對沽空機構大戰，散戶首仗大勝，與GME性質類似（集體回憶品牌、股價低殘）的AMC即時接力成為散戶再戰沽空機構戰場。結果在今年一月AMC由2美元賤價挾高至19.9美元。這次對壘亦為萬達帶來「罕貴」甩身機會，由2月到5月密密出貨，連同多年收取股息套現14.76億美元，對萬達而言都算係奇蹟級投資。
萬達離場後，AMC就成為沒有大股東的上市公司。用Yahoo財經App查AMC，持股人部分顯示現時機構投資者加埋持股比例只有25.99%，加上AMC之前向基金Mudrick Capital配股，Mudrick Capital之後極速賣清股份，再進一步壯大AMC散戶股東基礎。面對散戶成大戶情況，AMC公司公布將向320萬名散戶股東直接聯繫，以免費爆谷及電影優先場作回饋。消息一出，AMC曾爆升1.26倍觸發熔斷機制而停板。由AMC管理層策略都傾向討好散戶股東，反映散戶股東加上投資者對提升AMC價值的「實力」。
對香港散戶而言，買AMC都無得享受爆谷及優先場，加上現價逾60美元水平，無謂學美國散戶出動「鑽石之手」全副身家買。反正美股可以逐股買，睇走勢買幾股賺波幅，成功收割都可以自製唔少免費爆谷及戲票。
伸延閱讀：
【Yahoo財經App】美股要「Fact Check」其實唔難
