【熱話】打工仔最忌同老細熟

好多打工仔有迷思，以為盡量搏到同老闆熟，就會有位上，連周圍嘅同事都會葡萄。但世事有正反兩面，有唔少打工仔就係因為同老細太熟，反而自揭底牌，俾老闆食住。

網上有打工仔有類似經歷，就係發現當老細問你最近工作點呀，千祈唔好以為佢係關心你，佢其實只係想聽到你答：「頂得順」、「okay呀」、「無問題」，以上答案就會自動被演繹為仲有capacity、有空間、未夠忙，於是又開始派job。

第二，就係盡量唔好同老細交心，唔好俾佢知道你要供樓、養妻活兒。有網民就話因為全公司都知佢買咗樓，要供mortgage。就係因為俾人知你有財政壓力，老細就自然食住上，洗到你盡，睇死你唔敢反枱走人。私生活嘅事，返工就盡量唔好交代太多，遇著問你租定買，或者有無細路呢啲問題，諗過先好答。

第三唔好俾老闆add自己facebook同instagram，等於俾晒人知你屋企、朋友圈同上線狀態，隨時死得。

有樣可以俾老細知嘅就係，你嘅底綫。例如如果你想worklife balance，記得直接同老闆表明：「weekend/放假我唔做嘢」。如果你平日有返基本實力，相信佢係唔夠膽炒你。

同老闆相處真係一門藝術，唔係好易炒車！

===================

19網輕鬆爆料熱線，歡迎舉報老細同事19惡行，立即click入去講畀我哋知啦