【熱話】40幾歲打工仔 其實已經唔年輕

林鄭政府同班局長話60歲係中年，兼且未聽過有僱主唔請60歲人士，咁照計40歲應該就係「年輕人」。

話說近日有個訴苦post ，都聚集咗好一批「年輕人」。一班40幾歲嘅「年輕人」提早踏入中年危機，因為早年公司破產，令佢哋一下子失業，幾經辛苦搵到工，但人工減半，由原本賺44K，直插到20K一年嘅合約工，仲要冇醫保。

結果「年輕人」愈爆愈多，話自己眼見本地大學學士碩士，當中有HKU畢業，成40幾歲人做咗20年嘢，被裁後最近3-5年都係做得份9千至萬5蚊嘅工，日日加班俾人小都無得還拖，原因係怕再冇得撈。

仲有好多40幾歲人，仲做緊佣金Sales，例如企街sell電話Plan、有線電視等，好多時無生意得番最低工資，難再轉工，驚覺其實好多香港人，無論咩年紀，都一樣唔上唔落。

小編做公營機構嘅朋友，一樣係40幾歲「年輕人」，上年年中被裁後，到依家都未搵到工，原本月入55k，依家只係靠手上份約滿酬金頂住先。佢對搵工都唔太樂觀。

有打工仔就認為， 當你打份私人工，賺多過40k開始，就已經慢慢貶值，因為老細眼中，你有如一架二手車……

其實林鄭政府有無諗過，40幾歲打工仔，喺班老細心目中，真係已經唔年輕？

來源：香討

===================

19網輕鬆爆料熱線，歡迎舉報老細同事19惡行，立即click入去講畀我哋知啦