【理財攻防】非常時期如何提升理財安全感？

香港捲入中美角力之中，加上人仔一再下挫，揸港元、人仔似乎稍欠安全感，純粹想分散投資，其實未必要搬金搬美元放在屋企夾萬。

美元定存上車易

近日部分「有產階級」擔心政經前景不明朗，趕快到找換店搶換美元，部分人兌換額超過「一球」。但即使成功換到美元現鈔，要儲存如此大額銀紙都係一大難題。假如憂心港元、人仔受壓，最簡單對沖風險方式係開立美元定存。

美元定存吸引之處係上車門檻夠親民，例如滙豐美元定存，運籌或卓越理財客戶以2000美元做三個月美元定存，即可享0.5%或0.6%存息。虛銀眾安銀行則提供終極親民之選，1美元就可以上車，三個月可享0.4%存息，適合資本有限又想暫時分散資金的朋友。

「跟隊」買美元保單

試過買人壽、醫療保的朋友，都會留意到保單可選擇用美元或港元報價。早年由於保險公司會買入美元債券對沖美元保單，故市場上的保單主要以美元報價，後來為回應顧客需求才增設港元報價。

從方便角度睇，以港元計價可清楚知道保費及保單價值。不過憂慮港元貶值風險，買新單時就不妨選擇美元報價的保單。過去幾年內地人來港投保的高峰期時，他們都偏好選擇美元保單分散人仔貶值風險，既然有大眾智慧作投資示範，大家就不妨「跟隊」買美元保單了。

兩路押注海外股市

要分散風險另一途徑係押注海外股市，近期唔少人已加入炒美股大軍，不過要認真鑽研美股花的時間及心力唔少，想簡單一點就不如聽股神建議入手ETF。

鍾情科技股當然要聚焦納指，港股市場有兩隻追蹤納指一百的ETF，分別是安碩納指一百及BMO納指，入場費分別約為1.7萬港元及3800港元。至於想涵蓋不同行業美股，則可選擇追蹤標普500指數的領航標普五百，入場費約2100港元有交易，上車門檻較本地藍籌股更親民，而且有港股證券戶口就可以入手。

另一門路係強積金，唔少人習慣把強積金資產一開二，一半押注港股基金，一半投放於港元保守基金。假如你都沿用此策略，就不妨把一定比例強積金資產調動至美股或日股基金，這兩個市場近期韌力均較港股強，都有助分散投資風險兼提升對強積金資產的安全感。