理財要知藏富係邊度 (小勇哥)

祝各位讀者2020年健康、富足、快樂！小勇第一次喺Yahoo香港同大家見面，好多謝編輯嘅邀請。

講番理財，即係打理自己嘅資產同埋負債。資產方面，大部份港人主要買樓或買股，仲要集中晒喺香港。經常都有人問我，究竟買樓好定買股好？我會睇當地人藏富喺邊度。好似香港咁，大部份人嘅財富都藏喺地產。

2019年啱啱過，恒生指數全年升9%，遠遠跑輸畀全球大部份股市。香港樓市舊年升幅仲少過港股。官方私人住宅售價指數5月創新高後連跌5個月，全年升近5%。反映二手價嘅中原指數同樣年中創新高後跌唔停，靠政府放寬首置按揭，全年先有2.7%升幅。雖然齋睇一年港股好過港樓，但長遠睇，港樓2003年升到依家，期間每次回調唔夠兩成，今年仲創新高，但港股新高已經係兩年前嘅事。

港人愛樓多過愛股

我係土生土長嘅香港人，好清楚樓市穩定對香港幾咁重要，絕大部份香港人都將財富放喺樓，連香港政府都係靠樓市先有咁多收入。大陸情況差唔多，樓市不穩，中央一定出招，但股市出事，香港政府好少救，大陸政府一樣（近期中央對股市嘅重視程度前所未有咁高）。相反，港股唔係港人包括政府藏富嘅地方，所以將錢藏喺港樓，穩陣好多，回報亦高啲。

有無國家同埋人民將財富藏喺股市呢？美國就係啦！美股回報好過美國樓，美國稅收好高，收收埋埋啲養老金都係買美股，所以美股嘅財富效應比港股嘅效應高得多。上次金融海嘯就係因為美國樓市爆煲，影響到股市同埋金融業，美國政府先會狂減息同狂印銀紙，谷起資產價格救市，所以我嘅資產組合除咗港樓，仲有美股。下期我哋講吓資產組合仲有啲乜嘢係必須有。

小勇哥

Yahoo Money Talk客席主持、投資達人

本欄逢周四刊出