瑞典研究：睡眠不足會令人緣變差

自問人緣麻麻，覺得老細和同事平時都唔太搭理你？一係你份人好衰，一係你經常唔夠瞓，個樣顯得好攰、好頹。

事實上，經常睡眠不足的話，唔單止顯老和影響健康，有瑞典研究指出，瞓得唔夠，更會損害個人社交吸引力，分分鐘令自己與同事「絕緣」。

瑞典Karolinska Institute嘅研究人員對25名男女進行實驗，連續兩日等佢哋瞓足8小時後，逐一為其拍下素顏照；另又安排連續兩晚，限制佢哋只可瞓4小時，之後同樣拍下其素顏照。

然後，研究人員向122名陌生人展示每位實驗參加者嘅相片，並要求佢哋按相中人嘅吸引力、健康狀況、疲倦狀況和可信程度，多方面進行評分。結果發現，大多數人予以睡眠不足嘅一組相片較低分數，並承認自己唔會同烏眉瞌睡嘅嘅人做好同事。

研究續指，終日烏眉瞌睡、唔多健康嘅樣，會激起其他人嘅「疾病避免機制」（disease-avoidance mechanisms），令同事都想迴避自己，與你社交互動傾向大大降低。

慶幸嘅係，研究發現攰樣唔會令人變得唔可信，有Job還是要靠你做，只係平日放飯食lunch，同事未必會預你。

來源：Entrepreneur

===================

19網輕鬆爆料熱線，歡迎舉報老細同事19惡行，立即click入去講畀我哋知啦