【異動尋寶】好倉大屠殺後 What’s next?(魏力)
一個武漢肺炎,搭多個穆迪降級,再加上美股休市,港股昨日上演「好倉大屠殺」,裂口直落28000水平,午市前再整多單奧海城HSBC大撤離(fake news),踩到大家人心惶惶,lunch time收到最多的問題就是:「係咪要清倉收爐過年?」
記得29000時,不少粉絲還唉聲嘆氣:魏Sir,市升得咁急,追唔切貨呀!有無得回吓畀我買呀?家陣個市高位回1,000點,又淡到好似世界末日咁。見到呢類問題,魏力通常也是不置可否,皆因貪婪、恐懼還是要自己克服,我講乜都無用。都係嗰句:驚得滯(即係太多貨)就減到自己舒服的水平;無貨想買又驚再跌,就分注去買。經常博到盡,又孖展又賭白頭片,好易皮質醇偏高,做錯決定,由贏變輸。面對昨日市況,50%倉同120%倉,處境已是天淵之別。
周二美股表現成關鍵
心態講完,講番個市。作為肺炎源頭的大陸,上證昨日只係跌1%,前日仲要升;而港股兩日隊足3巴仙有多,唔講以為香港先係病毒源頭!咁詭異,好自然係同衍生工具殺倉有關。截至前日收市,牛證佔60%,28800至28000呢800點,一共3,400幾張期指的牛仔。清晒之後,再對落就只有27800一個重貨區(暫時628張期指)。
恒指再落與否,除了武漢肺炎消息外,亦很視乎週二美股開市表現,如當中港股無到,繼續創新高,港股有機見短期底部反彈,始終上星期連續五日千億成交,大戶追貨是不爭事實,不會因為疫症而忽然全線沽出。再說,週三起北水暫停供港,看似是壞消息,但亦可能因為咁,而將要減的貨提前完成,令週二跌幅加劇。
中線來講,中美央行放水、貿戰暫時停火都是事實,這兩個才是影響市況的最大因素。只要兩者不變,中線港股仍可繼續拾級而上。至於夠不夠膽趁跌市買貨,就要看個人膽量及持貨水平了。
魏力
筆者為證監會持牌人,未持有上述提及股份財務權益。
本欄逢周三刊出