【移民台灣】移民揸車入門教學(台灣篇)
上次介紹了移民英國換牌考牌須知,今次分享另一個港人移居熱點台灣,想揸車可以點換牌、學車及考牌。
換車牌百二元港元搞掂
本身擁有車牌,移居台灣即使唔急住用車,都不妨考慮換定車牌,主要原因係平及方便。現時台灣政策係外國人,包括香港及澳門居民,持有可居留台灣六個月以上簽證即可申請換領台灣駕駛執照(駕照)。除了有效簽證,申請人須準備香港車牌正本,還有車牌驗證書、護照正本及影印本、證件相兩張及獲認可醫院或診所發出的體驗證明。
申請文件較特別係車牌驗證書及體檢證明,車牌驗證書要在港預先申請,方法係到金鐘力寶中心台北經濟文化辦事處,提交文件證明申請表、香港牌車正反面影印本(印在同一A4紙)、車牌正本申請。至於體檢證明,申請人需到台灣各市監理所(相當於香港運輸署)認可醫院、診所進行簡單驗身,項目包括身高體重、視力測試、視野及色盲測試,費用約250元新台幣。準備好所須文件及填妥駕照登記書,申請人到各市監理所提交及支付200元新台幣申請費,一般等十分鐘即可拎到台灣駕照,體檢費加申請費百二港元有找相當抵玩。
台灣考車又平又易?
既然換車牌手續咁簡便,未有車牌係咪應該先在香港考車牌?不少移居台灣港人反而會認為到台灣考車學車更值搏,皆因台灣學車考車出名平夾易。台灣較受歡迎學車方式係到駕駛學校上駕訓班,私家車課程連報考費一般只需三、四千港元,鄉郊地方可以更平。駕訓班成為主流原因係考試採用「筆試+場考+路考」模式,路考是在2017年才新加,核心部分仍是場考,上駕訓班就可以熟習場考路標及口訣。加上倒後泊車、平行路邊泊車規定一口氣完成,就更需要熟習場地導師教路。至於考機車牌(電單車),不少駕訓班標榜學三日速成,之後就可以考試,課程連報考約一千港元。
台灣學車考車除了平,另一賣點係合格率高。年前私家車新增路試令合格率暴跌到62%已令不少台灣人嘩然,但參考香港運輸署年報,2019年香港私家車路試合格率只有25%,相比之下台灣考車命中率仍然頗高。不過台灣大城市出名行人、私家車、機車爭路,加上台灣用左軚、左上右落行車,港人換到台灣車牌或成功考牌,都應該考慮找駕駛導師補鐘或報讀道路駕駛訓練班,熟習路面駕駛技巧。
至於考邊類牌,純粹計方便及入場費似乎考機車最抵。雖然台灣人習慣用機車代步,不過機車上唔到高速公路,台灣交通意外死亡事故機車佔比高達六成。憂慮安全風險又有需要上高速公路,都係揀私家車較穩妥,而且有統計指油錢、泊車雜費加起來,台灣養車每月只需要約2000港元,相對香港養車負擔就輕鬆得多。
伸延閱讀: