雅虎香港財經 笑到最後｜如何衡量一個偉大idea（高明）
上兩篇講美股嘅好同壞，所謂買定離手，之後選擇繼續探索定係回歸comfort zone就係自己嘅決定。
美股、外匯、加密貨幣免費即時報價，自選投資組合獲取相關新聞提示。
到實際買美股，要買乜？再仔細啲問，美股有乜嘢其他股市提供唔到？答案係霸權與夢想。
霸權眾所周知，大家成日講嘅FAANGMT，就係一座難以撼動嘅霸權，強勁嘅程度係，同係霸權想入侵其他人嘅領域，都唔係咁易，其中一個例子就係蘋果（AAPL）嘅訂閱制內容並不成功；Google（GOOGL）、微軟（MSFT）做硬件永遠係蘋果嘅下把。
霸權財雄勢大都無法撼動，證明本身嘅護城河之深，就算你開架軍艦過去，都未必去到另一面岸。
霸權比較容易了解，另一個美股獨有嘅概念，就係夢想。夢想兩個字比較虛無飄渺，實際上業務就係總有一日成為霸權嘅潛力股。你話港股有冇？騰訊（700）都可以算係其中之一，但係內在及外在種種因素加埋，以今日作為時間點，未來喺港股搵到嘅潛力股，最多只可以稱霸中國，要稱霸世界，仍然係喺美股市場獨有，由於原因複雜，所以呢度唔詳述。
所有嘅夢想都係由idea開始，邊隻最終跑出人各有志，但係由90年代科網泡沫到而家，手提電話又有鍵盤，都冇鍵盤，到手提電話等於一個人嘅所有，過程係大家知道。簡單歸納其實有三個特徵。
一、普通到人人可用
上述嘅霸權股，冇一隻係太空科技你識我唔識嗰隻，曾幾何時上咗年紀嘅人會話上網係後生仔嘅事，今時今日Pokémon Go好似得返上咗年紀嘅人玩。類似情況喺亞馬遜等等嘅網購一樣有出現，上咗年紀嘅人網上購物可能仲狼死，串流電視可能亦都已經取代咗普通電視，撳幾個制就睇到。一個偉大嘅概念，去到使用層面，一定係大家都用到。
今年年頭曾經炒過3D打印概念，如果畀我去推測，未來3D打印將會好似微波爐一樣，每人屋企有一部3D打印機，簡單嘅手機殼、零件等等，上網買份設計圖、撳個掣、5分鐘食得嗰隻。
二、借力
上一代嘅霸權股例如可口可樂（KO）、迪士尼（DIS）、麥當勞（MCD）、豐田（TM）等等，全部都係自主研發嘅先驅，雖然有代理權呢一回事，但係主要嘅內容同埋設備都係自主研發同提供。最近10年嘅霸權就唔同，借力嘅比率非常高，例如一部蘋果手機，如果冇咗第三方提供嘅應用程式，將會係一部好沉悶嘅電話。又例如Google，最初只係一個盒仔。facebook更加將用戶變成產品。
又用3D打印做例子，將來你買部打印機好似去電器鋪買微波爐咁，但係設計圖係由所有第三方製造，設計者將會擁有版權，每打印一次收錢，借用咗其他人嘅創意去成就自己嘅硬件。
三、反對聲音強勁
比起以上兩個原因，第三個原因係所有顛覆性創造嘅根源，就係你一講個idea出嚟，就會有人柴台：
「得唔得？」「蝕死你啦？」「低B先去做呢啲！」反對得越勁，成功嘅機會越大，背後原因難測，唔知係咪因為創辦人會因為俾人話唔得而越戰越勇，又或者反對聲音源自既得利益。
總之越多人鬧，成功機會越大；如果個個人都讚，好大機會係一件中庸嘅產品；如果冇人讚冇人鬧，肯定係一件失敗產品。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
