雅虎香港財經 【移民英國】英國酒吧正式成社區中心？搵落腳點可能要更留心
英國財爺日前公布斥1.5億英鎊成立基金，資助社區團體收購當地財困酒吧。意味英國唔少Pub可能正式成為社區中心，搵落腳點就要更留心酒吧風險。
多功能Pub
英國飲酒消遣地方主要分Pub、Bar及Club，Pub即是Public House縮寫，歷史可追溯英王亨利七世將酒館統稱為Public House，到1552年通過法案經營Pub須領牌。歷史悠久的Pub，到今日全英國有約五萬家Pub，一些地區沒有超市但就有Pub進駐其中。正因為總有一間在左近，Pub通常兼具餐廳、社區聚腳點的功能。至於Bar，相對Pub設計較時尚浮誇，酒類選擇較多亦較貴。Club主要係跳舞消遣場地，一如香港的Club House，通常都收取入場費，雖然都有酒水供應，不過主要節目都係狂歡跳舞。
由於Pub數目多且全國各地都有，Pub對生活影響就較「埋身」。從文化及實用角度睇，Pub餐飲及聚腳功能都幾吸引。餐飲方面，除了最大路的炸魚薯條、迷你漢堡，亦有Pub會提供印度咖哩或近年大熱的東南亞美食。一些連鎖Pub如Wetherspoon更會以美食為賣點之一，除了招牌牛扒美食，更提供人造肉漢堡及早餐。對附近居民而言，Pub既是飲酒傾計場所，亦是一個可以輕鬆醫肚的地方。
除了飲酒傾計醫肚，唔少地區Pub兼具Community Pub功能，即係作為舉辦居民活動場所，例如最經典的Pub Quiz問答比賽，又或每周舉行棟篤笑。Pub亦會直播球賽，令Pub兼具運動酒吧功能，甚至直播除夕倒數，讓居民帶同家人在酒吧享受倒數時光。
Pub將更不可撼動
Pub文化聽起來好吸引，到英國住的話，居所附近有間英式Pub似乎都唔錯，但千萬不要忽略英國人醉酒問題。2019年全球調查，英國人成為全球最「爛飲」國家，每人平均每星期醉酒一次。2020年有調查亦指出逾5%年輕人曾因醉酒入院，比率明顯高於全球2%平均值。
每逢星期五、六晚上，在倫敦唔同地區街頭，都會見到飲到臉紅紅的男男女女，警車、救護車穿梭街道的響聲更係例牌城市配樂。因醉酒衍生的街頭暴力及治安問題，更是長年困擾社區的難題。
要英國人戒甩飲酒文化本來已經很難，現在英國政府出錢資助社區團體「保育」財困Pub，更會令Pub正式成為社區中心。日後你受附近Pub醉酒客喧嘩、打架困擾，而這間Pub已成為該區「社企」而不可撼動，相信你向Council投訴，都可能獲冷處理。
應對此趨勢，最有效方法就係「避」。所以移居英國揀住宅，日後更必須留意附近Pub的分布，確保居所與Pub有一定距離，既增加耳根清靜的勝算，亦減少因為頂唔順樓下不時變醉酒樂園而被迫搬走的風險。
【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。
伸延閱讀：
