雅虎香港財經 【移民英國】英國開餐好貴 想慳錢有乜選擇？
美股、外匯、加密貨幣免費即時報價，自選投資組合獲取相關新聞提示。
到英國旅行都會驚訝當地開餐使費唔平，移居英國要節省伙食費，究竟有乜嘢選擇？
買餸順便食平飯
BBC有一個頗受歡迎節目，係烹飪達人上門教人煮食，仲幫手計一計數，比對叫外賣同自己煮伙食費差幾多，結果相差幾倍係等閒事。所以初到英國落腳，唔少人都坦言以往香港日日出街食都要學習自己煮，基本一步就係搵平食材。
想買食材，超市係最方便途徑之一。香港人熟悉的英國超市如Tesco、Morrisons都未算平霸，想找平貨Aldi、Lidi及Asda係頗受好平的三大超市。Lidi的Pick of the week提供唔少平價食材選擇，例如£1.99就有一pick漢堡扒。Aldi的Super 6 & Super Weekly Offers亦有唔少實惠選擇，例如£5.99有一pick肉眼扒。Asda的Meal Plannning則會提供食品套餐選擇，例如近期推出的£8.9母親節早餐套餐，就包括煙肉、香腸、蛋、橙汁及麵包，方便子女為媽媽整早餐。
懷念亞洲風味美食，又被英國大城市亞洲特色餐廳消費所嚇怕，不妨透過網上超市入手亞洲食材自己煮。例如曾獲選為英國最好網上超市的OCADO，可以搵到唔少亞洲食材及調味品，其中的Yutaka的蒲燒鰻魚就獲唔少日本料理愛好者推薦。華人網上超市UKCNSHOP主打中日韓食材，並提供中文版面，揀貨品亦較方便。
除了超市，街市亦係入平食材另一熱門途徑。有居英港人表示，到街市買餸不妨留意一下有沒有東南亞人或華僑開的攤檔，因為通常會有較多亞洲人習慣選用的食材選擇，價錢亦較實惠。街市另一賣點係有熟食檔，在熟食檔買印度咖哩或泰式美食外賣，£5至£6就有交易。
出街食慳錢有法
間中想出街食，想慳錢都有唔少方法。如連鎖快餐廳通常都會推出會員App，打開App就會見到唔少每星期的優惠選擇。另外Too Good To Go App則與多間餐廳合作推出平至£2優惠以減少浪費食材，都係發掘平餐的好途徑。
至於平食Pub，唔少人都會推介連鎖Pub集團Weatherspoon，Weatherspoon賣點係套餐性價比高，例如炸魚薯條配一杯酒£6.35有交易，而且Pub可以坐耐啲，方便與朋友傾計。
想在網上發掘倫敦市餐飲優惠可留意TimeOut London Offers，部分優惠如£1訂購SimplyCook食材Kit都算幾吸引。另一熱門途徑係訂購TasteCard，月費為£3.99（首兩月免費）就可獲多間餐廳「2 for 1 meals」或半價優惠。
手頭居英資本好有限，又暫時未搵到工感受到開餐成本壓力的話，亦可考慮向社企尋求支援，例如成功登記成為Your Local Pantry會員，就可以每星期支付£3.5在中心選取十款食品，都可以減輕唔少開餐使費壓力。
伸延閱讀：
