街舖蝕死 網購得利
零售業愁雲慘霧,但一直散發負能量,都幫唔到件事。筆者反而留意到一樣嘢,唔知大家有無留意。
本港實體生意係大受打擊,你睇今朝新聞報,街舖蝕四成都無人要你就知道,最鍾意行街嘅香港人,終於逆轉,無人再想行街購物。
但一雞死,一雞鳴,喺物流業未被打壓嘅情況之下,其實反而網購會有得做﹗市民落街食唔到飯,就索性叫外賣,無咩事都唔好出街;想買衫嘅,咪去日本、韓國網買,而家有好多方法可以運來香港。
筆者朋友所經營不同國家貨運,見佢真係搞得有聲有色,因為真係愈來愈多人,開始習慣上網打點生活所需。
關於網購習慣,過去幾年,香港人係去到一個樽頸位,因為始終落到街買,你又點會上網買凍肉同酒水。
有位警隊家屬朋友,以前試過訂過支酒,HKTVmall就咁放喺屋企門口走人,當時朋友話「永不幫趁」,但最近佢又開始幫趁,仲話落街咁亂,不如大部份嘢都上網買算。
又有個朋友住黃大仙,佢話決定就算淘寶,都一次過買多啲,直接順豐,趁無事,就落街一次過拎。
近日又發生咗「激光中」事件,向來堅守實體購買的深水埗區蒙上陰影。筆者教書朋友,原本都打算去買,但事件發生後,他決定淘寶,向來都唔網購嘅佢,終於打開網購大門,仲同筆者講,淘寶上面啲鐳射筆,原來又平又多。
從香港零售發展局勢預測,做網購的不妨趁呢個時候大舉搶市佔率,唔知點解有預感,真正可以追上內地網購熱情嘅時機,好快就會到。
(PS:據說士多生意已收復失地)
===============
精選資訊網站「中環街市」 臉書粉絲頁