議員賣樓 等於睇死後市?
今個月可謂政治高氣壓來襲,既有貿易戰火不斷升溫,又有逃犯條例大龍鳳。在此敏感時刻,先有行會成員減持南區豪宅及車位,繼而有人翻舊帳,指滅鼠勇士梁議員於今年頭曾劈價賣黃埔花園單位。尊貴議員出貨,又是否香港經濟出事訊號?
純技術層面睇,貿易戰點都會衝擊一下香港貿易、零售,至於逃犯條例,外資怕成為中美角力人質,選擇走人亦不出奇。港樓要維持天價「雞棚」難度就越來越高,尊貴議員毋須透過其政經人脈收風,趁有可觀水位沽貨其實合情合理。
不過尊貴議員賣樓,他們真正後著可能係保留資金等買貨,多於睇淡香港「錢景」部署撤資。皆因即使經濟轉差,香港經濟優勢日漸與大灣區城市睇齊,港樓仍有力反彈,關鍵購買力係香港有產階級可以投資的目標越來越少。
線索係港交所就引入溶斷機制諮詢業界意見,雖然有業界反對,但搞得諮詢即係有興趣做,一旦落實,散戶炒港股難度就大增。再加上貿易戰繼續加時,人仔要貶值維持出口競爭力,而港元維持聯匯制度的話,或出現新一浪內地實力派投資者吸納港樓潮,再加上本地有產階級像內地人般唔敢炒股焗買樓及供應量縮水,港樓震完一輪又可能會出現反彈。
尊貴議員現在出貨保留資金,待港樓震倉再掃貨,未來就有機會再賺一轉,再順便以行動表示對香港信心,如果係有此盤算,就頂多係策略性睇淡後市而非係睇死後市,更何況梁議員年初申報亦少了一個美國物業,她亦算係用行動表達睇死美帝玩貿易戰自招苦果的「願景」吧。
===============
精選資訊網站「中環街市」 臉書粉絲頁