遵理的營運模式 就是不能樹大招風

.

上市公司高層處理生意億億聲，正路他們平日都係關心公市盤數、市場情況甚至中美貿易戰。然而一間上市公司掌舵人十分關注大學聯招放榜，在社交平台發表打氣文，更透露了一手創辦企業捱過三十年成功上市的營運模式秘密，就係「唔好諗咁多」。

會如此關注本地科舉考生感受的企業，相信大家都會估到係視考生為米飯班主的補習社。話說遵理母企精英匯創辦人「六月娘」發表打氣長文，認為考生即使聯招結果未如理想，最重要係毋須理會他人的閒言閒語，不要諗結果，堅持一直向前走。

她更拋出很「爆」的例子，謂打仗時最後死唔去的戰俘，求生絕技就係「唔好諗咁多」，繼續如常作息，有得吃時盡量吃，心如止水地熬過艱難日子。並由此引伸遵理過去三十年由營運模式到上市進程都一直未被睇好，正因為「唔好諗咁多」地堅持，才做到今日成績。

聽起來是否有點怪怪的？雖然係補習社，但始終都係教育產業，正常成功之道係對教育有熱誠、全情投入、發光發熱之類，豈會是甚為被動的「唔好諗咁多」？但諗深一層，上世紀九十年代名師熱潮造就遵理崛起，但亦令行內湧現多位強敵，更難搞係補習生意的根基係擁有大量fans的名師，過去有名師曾捲入桃色事件、超速駕駛、抄襲指控等風波，名師一旦出事，掌舵人就要諗辦法拆彈保住名師招牌，難度與娛樂集團應付明星醜聞不相上下。

即使無風無浪，名師又可能會忽然跳糟，更大鑊係自從政府取消A-Level後，補習社又少了一個可供吸金的公開試商機。要經營如此大挑戰的生意，如果太樹大招風，或名師太高調，隨時螳螂捕蟬，黃雀在後，倒不如低調一些，以退為進，又真係要「唔好諗咁多」，難怪遵理另一名創辦人選擇索性唔諗急流湧退專注慈善教育工作。

搞得上市，教育企業終極會諗的始終係如何在資本市場金蟬脫殼。要知道多隻在香港上市的教育股均實力強勁，亦不排除有大企業有意染指教育生意，有業務又有上市殼的精英匯，不難成為入股甚至收購的目標。

可能「六月娘」未必有賣盤意思，但戰俘不死絕技是有得吃時盡量吃，平日應付對家冷箭就「唔好諗咁多」，如有商機臨門時就要快手諗計點食糊吧。

===============

財經精選資訊網站「中環街市」 臉書粉絲頁