香港玩完？內地研開放海南島

之前話上海同深圳超越香港，大家當成耳邊風，但今次，香港可能真係會玩完﹗

話說國家主席習近平喺「慶祝海南建省辦經濟特區30周年大會」上宣佈，海南全島未來將建設為自由貿易試驗區之後，坊間已經有唔少香港好快「收皮」嘅聲音；原來當年碼頭只得椰子樹嘅荒涼海島，今日已經發展成被指可以取代香港的地步。

筆者都唔敢相信，但睇睇基本數據確實唔差，海南省2017年城鎮化率同埋第三產業比重，都已經超過50%，如果由1988年開始比對2017年GDP，實際增長了20倍以上。強項無疑就是旅遊業，據統計，2017年海南接待遊客6745.01萬人次，係戶籍人口嘅差唔多7倍。入境遊客111.94萬人次，提前3年完成百萬人次目標，服務業對經濟增長貢獻率達到79.5%，同香港一樣，服務業都係重中之重。

綜合近日資料與市場意見，海南島至少有以下地方威脅香港：

1. 經過多年經營，本身已經係國際旅遊島，於香港旅遊城市形象日漸失色的今天，開放旅遊島無疑構成致命一擊。

2. 海南省海岸線長，西海岸地區港口資源豐富，更可建立泛南海合作，不似深圳，到頭來還是要倚靠香港。

3. 官員有心做。上年12月其實海南省已經公佈咗直至2030年嘅旅遊發展總體規劃，目標係2020年旅遊總人數超過8000萬人次，年均增長7.4%。

4. 研開放博彩業，發展「競猜型體育彩票和大型國際賽事即開彩票」，隨時香港人都要過去玩。

5. 有「阿爺」加持。博鰲亞洲論壇上，習總引述鄧小平話，「海南島好好發展起來，是很了不起的。」

當然，一時三刻超越香港，想來都天方夜譚，但問題係唔少業內人士都擔心，如果海南島日後呢個自由貿易區，免關稅又免簽證，香港到時又係咪坐以待斃？

  （圖片：每年都有不少遊客前往旅遊，享受水上活動的樂趣）

就算真係好似習總所講，海南島只做「旅遊業、現代服務業、高新技術產業為主導」，而唔做「轉口貿易同加工製造」，但問題是，「轉口貿易同加工製造」於香港又剩下多少優勢？

===============

財經精選資訊網站「中環街市」 臉書粉絲頁