香港都曾經有貼紙相市場
今日宅界最大單新聞,應該係日本一家大頭貼機公司Make Software宣布破產,意味由約於1995年後開始的「貼紙相」熱潮(香港遲多幾年),終於步向終結。
曾幾何時,香港都擁有龐大「貼紙相」市場,瓊華中心、銀行中心、兆萬同銀城,全部都有貼紙相機,一個地庫就可以有20幾部機,學生妹多到插針都插唔入。
本來普普通通嘅場,只要有機,就有人流。就連KinKi Kids來港開演唱會,都要配合尊尼藝人貼紙機,俾女fans同男神影到夠。
2002年時,曾有兩名藍帽子警員,因為當值時影貼紙相當留念,引來一時佳話,筆者仲記得,當年有立法會議員批評,話藍帽子應該是特別精銳部隊,事件反映他們工作態度過於輕鬆。可見「貼紙相」,曾經是香港人生活一部份。
2005年旺角銀城廣場2、3樓,總樓面面積約14000方呎,平均呎價約11429元,租金回報率介乎三厘七五至四厘五,商場二樓正正就係「貼紙相」潮區「青春無限」。亦因為「貼紙相」後來降到10蚊,所以亦有「 10元經濟」之稱,係本港小本生意首選。
香港市場,都玩了差不多10年先去水尾,2006年之後,閒時會影「貼紙相」嘅人,其實已經大幅減少,有人試過在兆萬開業短片版貼紙相,最後都因為反應一般,被迫轉型。
當然「貼紙相」都有發展史,第一代的貼紙機是在1995年7月誕生,由新宿區的ATLUS公司開發,當時的貼紙相只有30萬像素;開始有PS功能嘅「貼紙相」,要到2004年先出現,部機可以為女士們眼耳口鼻作出5%修正,當然5%,已不能夠和今天的100%修正相比。
「貼紙相」死因就不多說了,不過筆者發現,近年圈內唔少人吹「夾公仔」機係投資潮流;行過唔少中小型商場,都的確愈來愈多「夾公仔」機,難度真的會是下一波潮流嗎?但應該,難以稱得上潮流吧?
圖片:青春無限貼紙城
===============
財經精選資訊網站「中環街市」 臉書粉絲頁