【魚樂無窮】大茶飯之後有甜品?(唐牛)
還記得兩個月前在這兒寫了一篇題為「唔容易食的大茶飯」,主角乃星期三爆升17%的國美零售(493),如果以文章刊出日計起,累積升幅72%,拍得住同期升八成的美團點評(3690)。
國美這兩個月的股價走勢,完全符合標題所講。大茶飯,ok啦,雖然輸畀美團,但總算跑贏恒指一大截,強如騰訊(700)及港交所(388),期內升幅也只是21%及30%,比上不足比下有餘了。
傳聞已出獄 續有炒作空間
唔容易食,亦十分準確。第一個月在0.8至1元之間浮浮沉沉、上上落落,好聽啲就係儲氣,難聽啲就係死唔斷氣,定力少啲都會被悶走。股價6月終見突破,原因係繼拼多多後,另一電商龍頭京東亦宣佈購入其換股債,兩大強人加持下,升勢一發不可收拾。及至星期三,市場傳出創辦人兼大股東黃光裕刑滿出獄,單日一度炒高25%,同系國美金融科技(628)更搶高近七成。
執筆之時,國美仍未有通告解畫,但根據市場消息,黃光裕已獲假釋離開監獄,人在北京,假釋監管期至明年2月16日止,相信未來呢段時間,股價會繼續有炒作空間,既然咁唔容易食的大茶飯你都食到,不妨等埋個甜品啦。
唐牛
本欄逢周五刊出