雅虎香港財經 《換命真相》下周一首播 重溫無綫經典穿越劇 你又最鍾意邊一套？
今年TVB台慶劇《換命真相》將於下周一（18日）首播，劇集由同Netflix原創劇《魷魚遊戲》男主角李政宰撞樣嘅譚俊彥、鄧佩儀及張頴康主演，以穿越為題材，講述工程師時光（譚俊彥飾）獲得重生機會，希望扭轉自己命運及阻止災難發生。穿越劇一向有唔少捧場客，唔知《換命真相》會唔會引起追劇熱潮呢？其實過往無綫都有唔少穿越劇，而家就同大家回顧一下啦！
《金宵大廈》（2019年）
穿越奇幻劇《金宵大廈》播出時叫好又叫座，被譽為「年度最佳神劇」，更喺《萬千星輝頒獎典禮2019》亦獲得多個獎項。劇集主要講述講述大廈看更阿蕭（陳山聰飾）及住客空姐Alex（李施嬅飾）嘅一段前世今生孽緣愛情，期間會講下其他大廈住戶所遇到嘅靈異怪事。去到尾段，阿蕭發現自己喺生死邊緣時可以穿越時空，於是佢苦求林老師（劉江飾）幫助，最後旭輝同Coco成功逃難，結果引起「蝴蝶效應」，就算阿蕭同Alex喺金宵大廈相遇，佢哋都只係陌路人。劇集大受歡迎，無綫隨即宣布原班人馬加新演員添食開續集《金宵大廈1968》（原名《金宵大廈2》），較早前劇集部分劇照率先流出，淨係睇劇照已經可以睇到劇集繼續營造懸疑、詭異同緊張嘅氣氛，相信唔少觀眾都好想劇集快啲出街。
《逆緣》（2018年）
《逆緣》由陳家樂、黎耀祥、姜大衛及林夏薇等人主演，主要講述抗日游擊隊成員鍾定國（陳家樂飾）喺1945年被日軍擒獲，之後更被冷凍在實驗室，直至2018年先意外被解凍甦醒，並對新事物不理解而鬧出唔少笑料。鍾定國與73歲嘅兒子賀和平（姜大衛飾）及47歲嘅孫仔賀永年（黎耀祥飾）相遇，發覺佢哋財迷心竅，執迷不悔。陳家樂外型大隻靚仔，劇中表情神態呆直，表現亦令人喜出望外，成功憑「爺爺」鍾定國一角人氣急升。
《誇世代》（2017年）
《誇世代》係一套劇情天馬行空到爆，加上陣容頂盛嘅台慶劇。劇集一開始就講到投資銀行家宋仲基（歐陽震華飾）與廢青包豹（吳業坤飾）靈魂交換，鬧出唔少笑話。之後當佢哋喺巴士站用力摩擦磅重卡，就會召喚到一架有豬頭人揸嘅時光的士。劇情去到尾段，仲講到歐陽震華知道田蕊妮去咗未來，當佢哋坐時光的士去到2047年搵田蕊妮，發現香港已變成廢墟，大部分人類變成喪屍。
《超時空男臣》（2017年）
被指與韓劇《閣樓王世子》十分相似嘅《超時空男臣》由蕭正楠丶曹永廉丶何廣沛丶田蕊妮丶王君馨及朱晨麗等人主演，劇情輕鬆幽默再加上演員喜感十足，深得觀眾喜愛。劇情主要講述明朝大將軍袁崇煥（蕭正楠飾）、大學士左光斗（曹永廉飾）及太監李進忠（何廣沛飾）為保護太子妃（王君馨飾），點知意外穿越時空去到現代香港。三位男臣穿越到香港尋找太子妃之外，亦巧遇菜館老闆方惠芝（田蕊妮飾），但因古代同現代嘅差異而鬧出唔少笑話。
《EU超時任務》（2016年）
《EU超時任務》搵嚟王浩信、朱千雪及袁偉豪等人主演，劇情講述警察朱千雪及圍村村長王浩信都擁有返回過去嘅能力，可以重回現場去破案，而最特別嘅地方就係不停圍繞4月1日至4月3日。另外朱千雪同埋王浩信由最初嘅冤家變成戀人，但二人感情遇上考驗，最後渠頭為咗救阿風，寧願忍受阿風唔記得佢嘅痛苦，選擇再次穿越返到去4月1號，真係睇到觀眾心都噏埋，更被網民激讚係難得一遇嘅神劇。
《張保仔》（2015年）
由陳展鵬、洪永城及陳凱琳等主演嘅《張保仔》雖然係穿越劇，不過大家最深刻嘅一定係無綫耗資3000萬製作嘅簡陋CG效果。劇情主要講女警黃娣妹（陳凱琳飾），因為追查案件意外穿越返回清朝時代，之後佢仲認識到十一貝勒（陳展鵬飾）及海盜張保仔（洪永城飾），捲入清廷皇族與海盜嘅鬥爭。
《情逆三世緣》（2013年）
《情逆三世緣》由「收視福將」歐陽震華與關詠荷主演，劇集有三次穿越合共三世，包括宋代、1950年代香港及現代香港，劇情主要講述一段穿越千年嘅三世姻缘，督察袁金昌（歐陽震華飾）錯手殺死女友楊夕雪（關詠荷飾），之後金昌靈魂出竅穿越時空回到宋代與楊夕雪一樣樣嘅韓霜霜相遇，時光更回到50年代，二人亦再一次重遇。
《回到三國》（2012年）
由林峯、馬國明及楊茜堯等人主演嘅《回到三國》，主要講述現代MK仔司馬信（馬國明飾）回到以前三國時期，更認識咗諸葛亮（林峯飾）丶劉備（李國麟飾）、張飛（曾偉權飾）及關羽（歐瑞偉飾）等英雄人物，期間鬥智鬥力又鬥氣，仲同一齊參與三國歷史大事。
《巴不得爸爸…》（2009年）
輕鬆穿越劇《巴不得爸爸…》由陳錦鴻、吳卓羲、胡杏兒及楊思琦等人主演，講述楚帆（陳錦鴻飾）和楚慈（吳卓羲飾）係兩父子，楚慈因為一次意外入咗衣櫃，穿越回到60年代嘅香港，仲要認識埋年輕時嘅爸爸，更開始明白爸爸嘅做人處事態度。去到結局時，原來唔止得楚慈可以穿越時空，連程蘭芬（楊思琦飾）亦成功穿越嚟到現代香港。唔少網民都覺得呢度劇好好睇，不過就認為開放式嘅結局有少少爛尾。
《隔世追兇》（2004年）
《隔世追兇》由郭晉安、陳慧珊及許紹雄等人主演，主要講述重案組高級督察何天光（郭晉安飾），而佢已過身嘅爸爸就係便裝警員何大河（許紹雄飾）。二人透過「大哥大」電話穿越時間溝通，佢哋通話除咗共同追查真兇之外，仲加深咗佢哋之間嘅父子情。
《九五至尊》（2003年）
《九五至尊》搵嚟江華、張可頤及吳美珩等人主演，講述呂四娘（張可頤飾） 行刺雍正皇帝（江華飾）時遇上水龍捲，結果二人雙雙由清朝穿越時空到現代香港，二人學習適應現代生活，不過動作誇張及說話方式與現代人做成強烈對比，高高在上嘅皇帝更成為「打工仔」李大蝦，笑料百出，真係非常搞笑。
《尋秦記》（2001年）
如果要數無綫最成功嘅穿越劇，相信唔少人都會選擇《尋秦記》，劇集由古天樂、林峯、宣萱、郭善妮及滕麗名等人主演，主要講述項少龍（古天樂飾）穿越時空回到二千年前嘅戰國時代，利用歷史知識幫助林峯成為秦始皇。現代人穿越到古代必定鬧出唔少笑話，例如講嘢時中英夾雜、著T-shirt及送朱古力俾古代人等等。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
