【上車故事·業主篇】海嘯買股輸6位數 豐寓業主：「買樓最差叫有得住」

「年輕時，輸過一筆錢……」高生在2008年金融海嘯買股票，結果輸了6位數金額，他說那時都不叫做炒股，只是買入的股票高位急墮，深深體會到股票輸剩張廢紙的感受，那個股票冧巴不堪回首。

十年人事幾番新，搵返輸了那筆錢，一朝被蛇咬，自覺買樓好過買股，2017年以約460萬元買入葵芳豐寓一個實用251呎單位，「投資又好，自住又好，總之買樓最壞打算係起碼有得住！」

高生表示，2008年金融海嘯買股票輸了6位數的積蓄，「當時都唔係炒，是高位跌落去，得返張紙咁。自己又唔熟悉，就算坊間啲專家都無責任幫你睇住，無人會打電話叫你放股票，所謂幫你睇住啲專家都唔理你，都係靠返自己。如果又唔熟，又唔得閒睇，變咗都係買樓穩陣啲。買樓最壞打算係起碼有得住！」

上了寶貴的一課，十年來股票甚少沾手，當年輸了的錢，今天總算搵得返。兩年多前四出睇樓，租樓住的他覺得買樓回來收租又得，自住又得，覺得買樓比買股票穩陣。村屋、荃灣及將軍澳等新盤都睇勻，「睇完感覺到，知道鍾意邊類。目前新樓千篇一律，最緊要係咪啱自己。」

過去2年抽過5個新盤，有2個都抽到前籌惟沒有合適選擇，最後睇中葵涌豐寓，心儀項目天台特色戶，無奈排到他時，單位已被揀，最終以約460萬元買入一個實用251呎單位，另連平台，呎價逾萬八元。

等了一年多，現在收樓入到單位第一印象是「目測唔覺有啲乜問題，希望唔會有問題影響到生活，最擔心是漏水。單位係自己心頭好，俾滿分啦，但呢樣嘢係唔會有，就算大發展商都無100分啦！最唔滿意房間幅牆，縮細少少，房間感覺闊啲。」

對於樓市轉勢，他就說：「現在買樓應該抵啲，但無得咁講，就算跌咗都貴，唔會返去廿年前個價，呢個係無可能嘅事。跌多幾十萬，其實除非有啲人住公屋就可以慢慢等。樓神(長實執董趙國雄)話樓價跌3成，但有啲納米樓位置好遠，好似屯門龍床盤，交通真是唔係你諗咁方便，呢個唔關係唔係納米，無論1房定2房，都唔會揀個度。」

他續稱：「樓價跌無問題，跌嘅話，大家可以買多間來收租囉！太貴，大家都唔好，跌啲，大家開心啲。一跌，無預備嘅人，點都係買唔到。真是跌到好犀利，經濟好差，大家都唔開心。跌3成，咪有一班人上到車，咪開心啲囉!當時買樓係咪好時候，每個人唔同，負擔得到咪得囉，無話好唔好時候，邊有得講，買完再升又唔講，個個馬後炮!我唔識睇樓市，呢啲交俾專家。我買到自己啱嘅就ok！」

記者：陳家雄
攝影：鄒潔珊