【中環打工妹】一個買樓先結婚嘅故事(袁莉詩)
「Congratulations, 結婚後住邊呀?Carrie」
Carrie 係莉詩嘅中學同學,當年讀書同同班同學打得火熱,個個姐妹都估佢地讀完大學就會結婚生仔,組織一個美滿家庭。雖然男友一直都係同一個,但愛情長跑原來唔止七年,由中學跑到大學,仲跑到出職場,七年之後又七年,跑下跑下比 Carrie 更早結婚生仔嘅大有人在。
其實 Carrie 都唔係無結婚嘅機會,但佢哋堅持要買樓先結婚就搞到結婚之期不斷往後推。當年樓價仲係 200-300 萬時,Carrie 都有機會買樓結婚,但 Carrie 因為追求市區新樓有會所,而錯失一個入市機會。
機會一過,Carrie 就開始面對漫長嘅升市,睇住樓價由無招到辣招,再來雙辣招,Carrie 嘅新樓加會所夢想已經愈來愈遠,本身夠俾樓價一半嘅錢依家只係夠畀首期,由市區新樓無會所降到只能夠買新界新樓無會所,Carrie 呢幾年嘅心情同樓價成反比。
財經專家成日話樓價有跌嘅可能,有下跌風險,但 Carrie 聽一次鬧一次,因為佢正正就係等跌唔買住、等跌唔買住,結果買唔到嘅例子。每當樓價似乎開始跌少少,跌唔夠 10% 又會有一堆用家入市令佢升番上去,然後再展下一個升浪,Carrie 嘅結婚夢就咁隨風飄去。
等咗咁多年,Carrie 今年終於都出手買樓,買嘅雖然唔係市區新樓有會所,而係市區二手樓有會所,但總算正式展開買樓結婚生仔嘅第一步,可喜可賀。當莉詩行過尖沙咀仍然見到好多操國語嘅遊客大肆購物,新盤仍然熱賣,財爺又話辣招不減嘅時候,莉詩希望 Carrie 結婚後可以開心快樂下去,無需求供樓而心煩。
簡介:八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻