【中環打工妹】中美貿易戰下的 Apple（袁莉詩）

呢個世界任何事任何人都需要一個下台階，正好在阿根廷舉行的二十個集團（G20）峰會就為中美貿易戰提供了機會。最新消息報導，中國國家主席習近平與美國總統特朗普達成共識暫時休戰，明年元旦起不再擴大加徵關稅，同時爭取90日內達成協議，此消息相信令全球蘋果公司（AAPL）投資者可以鬆一口氣。

畢竟最近蘋果公司禍不單行，先是被多間供應商一齊唱淡盈利前景，最近又與高通公司（QCOM）因為iPhone專利使用費而搞上法庭。不過，莉詩最擔心都係蘋果被特朗普點名指iPhone有可能面臨10%關稅，這意味蘋果產品避免不了要成為中美貿易戰底下的犧牲品。對此，瑞銀更有報告估計，若iPhone被加徵10%關稅，蘋果的營業額將會虧損15億美元；若稅率增至25%，利潤受損則會增至38億美元。

若回顧今年蘋果股價表現的幾個重要階段，10月3日蘋果以1.103萬億美元市值攀上頂峰，但是好景不常，之後中美貿易戰火勢加強，兩方官員不時出口術，多少都對蘋果股價帶來波動性影響，而11月份蘋果股價累積跌幅18.4%，更是2008年9月以來單月最痛表現，拖累「蘋果粉」輸咗不少錢。

雖然現時中美兩位大佬見面握手言和，但政治咁複雜，今日談判順利並不代表明天協議不會破裂。莉詩認為，現實層面上蘋果公司不可能把生產線大規模遷出中國，如果最後大佬們傾唔掂數，蘋果只有兩條路可行：（一）把關稅轉嫁消費者負擔，但產品成本上升，勢必重創市場需求；（二）自己硬食關稅成本，結果是影響公司盈利，然後拖累股價走勢，投資者荷包受害。

不過，做人最緊要樂觀，所以莉詩相信兩位大佬都明白呢個道理，中美貿易戰宜短不宜長，最後大家面對全球觀眾笑呵呵「下台一鞠躬」咪好囉！說到底，大家都係搵食啫，見好就收喇！

作者簡介：八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻