【中環打工妹】唔想資產貶值? (袁莉詩)
以前睇一間公司好唔好,大家會睇呢間公司有幾多資產,有幾多物業,有幾多架車,有幾多架船,資產淨值有幾多。來到 2017 年,一間公司有幾多資產好似唔多重要咁, Facebook、Apple、Google 做到咁大,無咩人在乎佢有幾多資產,只係在乎佢搵幾多錢。
以航空公司為例,曾幾何時會以自己擁有幾多飛機為榮,但近年航空公司都希望將飛機呢樣咁重要嘅嘢減走,令自己公司睇落更加輕盈,負債減少,資產減少,令整體資產回報率更高,予人一種公司唔錯嘅感覺。
一間航空公司點都要用飛機,點樣喺盤數入面減走啲飛機呢?答案好簡單,將本身買嘅飛機賣畀人,再自己租番,咁做係會計上係支出,唔係貶值,睇落好似用幾多駛幾多咁,無咁多固定成本。
如果本身航空公司無飛機咁點呢?唔駛怕,有需便有供嘅市場,依家有好多飛機租賃公司,再大嘅飛機佢都可以買返來租畀你,佢繼續賺息差,你又繼續有飛機做生意,雙贏局面,大家開心。
今時今日想知一間公司好唔好,只係睇盤數,知道佢有幾多資產,賺幾多錢未必夠準,因為仲有好多方法幫公司整靚盤數。下次再同大家分享另一個近年常見嘅方法。
簡介:八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻