【中環打工妹】 指標不一定是「指標」（袁莉詩）

只要有少少投資股票經驗的人，就算無讀過金融學科，都會聽過市盈率 、盈利增長率、派息率等等的財務指標。通常財經演員都係攞住呢類指標同一眾散戶分析股票。而散戶們亦都好鍾意用呢類指標去支持自己買入或賣出股票的決定，甚至以呢類指標作為向朋友推薦某某股票的理據。

入行經歷更多實戰經驗後，莉詩認為睇指標固然重要，但研究唔同類型的公司，就應該睇唔同的指標，甚至可能無一個大家認識的指標可以睇穿哂各類型公司。以科技股為例，市盈率 、盈利增長率、派息率等指標在近年爆升的 Amazon、Google、Facebook、ARM 等科技公司上均不合用，因為這些公司上市初期根本未有盈利，又怎會有市盈率呢？即使盈利不俗，但大部分科技公司都喜歡將賺到的錢繼續用來投資而不派息，派息率這個指標就等於被廢了武功。

既然傳統指標不適用，當然可以睇新指標 –「每月活躍用戶」 (Monthly Active Users, MAU)。分析員就會以呢個指標去分析 Facebook、Twitter、騰訊等等科技公司的前景，因為每月活躍用戶愈多甚至上升，表示愈多人會不斷用這個產品 (至少一個月用一次)，就等於公司有更高的賺錢能力和潛質。

但「每月活躍用戶」這個指標絕對不適合用來分析其他行業，例如一行之隔的電訊股就不適用，因為電訊用戶多不代表盈利多，所以要改睇「每用戶平均收入」（Average Revenue Per User, ARPU）方能反映實。

投資不要一本通書睇到老，要靈活變通，了解清楚每間公司的特質，再決定用哪一種指標去衡量是否有投資價值。有機會再同大家講下一些所謂較「高級」的研究指標。

簡介：八十後中環打工妹, 英國畢業後回港體驗200呎豪宅獨立生活, 關心Fintech動向, 既愛financial times, 也愛陶傑張小嫻