【代理Secret】揀經紀 揀個豬嘅?(樓民)
有朋友問我,揀經紀,究竟揀個醒嘅好,定揀個豬豬地嘅好?
我呢個朋友,睇樓已經睇咗一段日子,亦都唔止跟過一個經紀睇樓。其實大部分人一生人入面只係得一至兩次機會買樓,而呢一至兩次決定,足以影響你人生裡面最少兩至三個十年。而呢一兩個影響人生大部分時間的決定,你要交託予一個素未謀面(俗稱三九唔識七)的地產代理幫手,你都咪話唔驚。所以朋友咁問我,十分正路。
有人揀地產經紀,會特登揀豬少少的,貪佢哋唔會出古惑,亦都無本事出古惑。最好係蠢得來又勤力,不斷SERVE我又唔會坤我。呢種經紀,基本睇樓可以,而且應該唔會射漏盤,即係市場上放賣緊的盤,佢都會介紹畀你,你唔會MISS咗任何機會。不過,通常佢哋去到埋牙傾價的時候分分鐘會激到你死。因為佢哋只懂做傳聲筒,「業主話個價一定無得傾喎,不如你添多少少啦」「無辦法喎,業主唔肯減」呢種經紀大部有一個特質,就係捉唔實業主諗緊乜嘢,又或者根本無了解你想要乜,唔會識得點樣去游說別人(包括買賣雙方)。
有人知道豬的經紀唔會幫到佢,於是乎佢地會搵一個醒目的幫手。但問題係醒目嗰個,邊句真、邊句假你無辦法分辨得到,分分鐘你被人坤咗都唔知。我朋友就係面對呢種兩難局面,所以向我求救。
你問我,我一定會揀一個醒目少少嘅,因為今時今日有能力買到樓嘅人,唔多唔少有返咁上下能力,一定唔會蠢得去邊,所以斷估佢地同蠢人應該溝通唔到。如果佢地搵蠢的經紀幫手搵樓,未睇樓都可能已經想死(係想個經紀死)!所以我都係建議我朋友搵返個醒醒目目的幫手。
唔驚佢出古惑咩?坦白講,驚!不過唔驚得咁多。不過其實講來講去,大家最驚咪又係經紀「渣價」!樓民就認為,其實佢報畀你個價錢有無「渣價」根本唔重要,因為如果佢報個價,無論係真係假,如果係離晒地嘅,你都唔會再有興趣傾落去;如果係已經好合理,咁經紀「渣」極有個譜。最重要係究竟最終成交價錢係唔係合理。如果係合理,你又無買貴到 (尤其以現在市況),咁已經OK。
至於搵個醒目的經紀,至少起碼佢會知你要乜、識得睇你眉頭眼額,估到你想要乜嘢。最重要係在整個買賣過程當中,佢地會好為你著想,或者表現到好為你著想,總之你會覺得佢係有心為你做嘢,維護緊你嘅利益。你買樓會買得好安好放心,就係咁簡單。
最後,我畀朋友的建議係:唔需要機關算盡同經紀鬥智鬥力,總之你同邊個經紀溝通起上來覺得舒服嘅、叫你畀佣金佢你唔會覺得條氣唔順嘅,咁你咪搵佢幫手囉!
=============================================