【代理Secrets】大陸富豪的煩惱(樓民)
大家早前見到范冰冰單嘢,應該都估到大陸班有錢佬唔多掂,依家政府話「國進民退」喎!連阿里巴巴馬雲都唔撈,可想而知壓力幾大。
我樓民有個客,年頭買咗個凱旋門大單位,當然你感覺到佢只係用散紙去買呢間樓。當時佢打算裝修完租出去,但早前臨簽租約時,忽然又改變主意話唔租。因乜事?原來佢因為大陸氣氛唔多掂,打算留嚟自住!查實香港搞個「明日大嶼」,即係變「明日大陸」啦,嚟香港有用咩?
阿陳總就話,其實為安全計,佢過去十年已經開始部署,老婆同仔女除咗有香港身份證,仲有澳洲同加拿大護照,要走佬係可以走好遠,不過佢自己如果唔係走投無路,應該都會留喺香港,因為怕去到外地會言語不通,融入唔到喎。
好多人覺得,佢地要走佬,咪要拎錢嚟香港買樓,又托高個市?查實真係有錢果班,唔係到今日大難臨頭先走啦,陳總自己就一早搬咗大筆去歐洲,果邊啲生意都營運咗十年,當然亦喺全世界買咗樓,年頭幫我買果間,當然唔係唯一一間,亦唔係最後一間。就因為係咁,佢間凱旋門,依家丟空喺度,又唔係住,又唔放租,咁就白白浪費十萬銀一個月喇!當然,幾千萬都係散紙,十萬八萬又算得乜嘢呢。
=============================================