香港股市 將收市,收市時間:2 小時 5 分鐘

【代理Secrets】非關良心 醒目代理唔會推十成按揭(花生友)

最近元朗新盤推到十成按揭,一副要一舖清袋嘅勢。啲人覺得經紀實會衝埋去推啦,個plan咁筍,實做到生意。實情係,除非新入行,或好耐無開過單,否則有啲經驗嘅經紀,唔單止唔會推呢種plan,仲會勸個客唔好制。點解?

首先,大家睇完報紙,好似就已經明咗個plan,「即係按埋阿爸阿媽供滿果層樓,發展商咪做到十成囉」。但大家如果真係親自睇價單,就會發現解釋呢啲plan嘅章節,無一百都有幾十行蚊型字,而且明明隻隻都係中文字,但係串埋嚟睇其實唔多明。點解要咁多字?因為要好靚咁埋藏啲魔鬼細節囉!邊有咁大隻蛤蜊隨街跳先。

第二,直接啲講,經紀嘅工作唔係要個客去簽臨約,而係要個客完成交易,先至有佣收!呢啲plan吸埋啲客都唔方有錢,可能真係掹車邊到少一千蚊就批唔到個按揭,咁佢呢幾個月內真係有乜嘢冬瓜豆腐,可能最終真係要撻訂。發展商仲可以將訂金袋袋平安,我地就白做,咁點啱數先?

第三,講返果一百幾十行蚊型字,事實上都好考閱讀理解能力,而閱讀理解並唔係經紀專長,一個唔覺意睇漏咗啲嘢,講漏咗可能只係「阿媽係女人」一句,到個客要撻訂時,怒火無處宣洩,結果一定係「你個XXXXX經紀呃我!」然後告上地監局。喂呀,你自己明明搞唔掂,夾硬都想上車,出事又想賴人!好多人覺得經紀都係無賴,但我相信喺香港從事服務業嘅朋友都知道,港客往往先至係最無賴!

為免白做,甚至畀人告到上地監,又唔係真係急開單急到瀨的話,醒目經紀一定會建議個客唔好用呢種plan,用就用啲簡單易明、兩行睇晒、穩穩當當嘅plan,咁單生意先至真係算做得成。

=============================================

中小型代理行大匯集 Yahoo!搜尋器筍盤最多最齊