【企業錢途】 劉備與諸葛亮（林苑莉）

以前睇歷史書都知道有好多成功君主背後有不少得力忠臣襄助，就好似漢代劉邦的張良、三國時期曹操與荀彧、劉備與諸葛亮等等，呢啲成功背後嘅關鍵在於下屬敢於進諫，痛陳利害，而決策者又能伺機而動，為自己奠定創業基礎，留名於世，尤其係劉備與諸葛亮呢種合作無間，如魚得水既上司下屬關係更成為後世管理者與下屬相處的楷模。時至今日，作為決策者又應該如何收納意見，使公司行得更快？

作為一個服務提供者，顧客意見回饋係其中一個最直接的渠道。顧客作為受眾會最能夠直接反映問題，而有部份既feedback 亦有合理可行解決問題既方法，而決策者迅速執行使問題有效解決。就好似電動車Tesla咁，早前就有車主因車輛停泊充電站使其他電動車未能充電，就主動於其品牌的Twitter表達不滿，提出充滿電就開始收費，而決策者收到意見之後就立刻推行，使到充電站問題在一定程度上解決。可見聽取顧客意見亦是其中一個有效渠道。

另一個例子就係由下屬向上司表達意見而有效令公司更好。中國的海底撈火鍋相信未試過應該都有聽過啦，點解佢會有有咁多唔同創意特式野搞就係因為佢地有個好特別既獎金制度，員工可以提出有效可行既意見去改善服務，而意見一被採納就會有特別獎金，所謂重賞之下必有勇夫，前線員工自然會有更多不同意見向上級表達。而上級就係透過呢啲唔同既途徑係可以有效改善服務。

作為一間公司，去管理或者去發展得更遠，單算管理層去諗並非一個良好嘅發展，作為公司決策者，面對下屬既意見時有冇詳細考慮嘅空間？還是拒人於千里之外？而作為員工，面對有問題你會選擇視若無睹還是挺身而出？作為顧客既你，你會選擇投訴還是「教精」間公司？相信大家都需要諗一諗呀!