【企業錢途】 腦細授權的藝術（林苑莉）

打工仔最開心或最想他朝做腦細。不過當你在其位，上有董事局股東們，下有班伙記，腦細真心不容易做。做得手下，個個都希望腦細信自己，畀權力，打到骰，做到一人之下萬人之上。腦細授權及權力下放，於古時等同帝皇論，皇上能否用人選兵用賢，接任人強弱，直接影響國家安定，國庫多少只是結局。

真心話，身為腦細點會唔想放權，唔放做唔大，前提是敢唔敢放，同該不該放。

腦細授權做得到位與否，視乎以下幾個項目的做得到唔到位。

公司系統是否到位

國有國法，家有家規，軍紀嚴明，公司制度崗位及職能清楚，員工如能有合適的授權，不但工作順心如意，合作快，成效高，唔使下下做嘢都畀人阻鬼住哂，其實好到高手或千里馬胃口。反之，如軍紀不嚴，做事冇系統，或公司有斷層零溝通，你腦細好難估個結局係點，真心驚有關公災難，驚中大伏，所以好多公司中高層都做到嘔，好多時都驚有鑊，唔敢授權。

員工士氣到位與否

工作士氣高，全民皆兵，大家都努力為公司，腦細授權，等如對員工信任，任其所長，長搵長有，財源廣進。反之，員工各懷鬼胎，最緊要而家有錢分，其他同事由得佢死，腦細授權出師無名，只會令人更擔心公司冇王管。

名權責利

打工做嘢，開心是重點，錢途才是前途。冇錢，做嚟為咩？授權最重要是有相對的等價交換 – 利益。才是名正言順。腦細放權可以不一定是現金 – 公司Stock Options ，股份或花紅獎勵都可以。做得腦細點會唔識計數，無寶不落，手下的工作能力，幫公司賺錢不用多講，一定係must啦！

授權話難唔難，話易更是不容易。腦細心，海底針。