【唔使等上架】入戲院點先可以平睇首輪電影？

踏入新一年食肆公共交通公具都積極加價，唯獨戲票唔覺有加價消息，不過在旺區戲院戲票價錢閒閒地過百元，想用平啲價錢睇首輪電影，就要按自己喜好選擇適合自己的慳錢方案。

方案一：做會員

現代人入會是家常便飯，由訂閱串流媒體到網購，入會係例牌程序。睇戲亦不例外，不過院線較多著數的會員計劃都要收錢，選擇入會，你要檢視自己兩項條件。首先係自己是否每月至少睇一、兩次戲，因為較密睇戲可以用盡折扣及優惠券，付費入會才算有賺。其次係自己是否習慣去特定院線睇戲，抑或是逛街時即興到附近戲院睇戲，若是後者就無謂花錢參與某個院線會員計劃了。

純睇價錢，一般院線會員年費都係$120，不過嘉禾就只需$50，睇戲可享85折，如果經常到幫襯嘉禾院線都值得考慮入會。

方案二：簽卡買飛

喜愛即興睇戲，銀包又唔只一張信用卡的朋友，簽卡買飛就明顯較做院線會員更靈活。比對一下睇戲信用卡優惠，東亞World Mastercard在UA及MCL可享8折及9折優惠；Citi信用卡在MCL、Cinema City及英皇都可享9折、88折及8至9折優惠；渣打信用卡在MCL及星影匯可享9折優惠。喜愛睇戲又想慳少少買飛錢的朋友，不妨在銀包增添這幾間銀行的信用卡。

值得一提在MCL及嘉禾用EPS購票，可享9折及95折優惠，較適合習慣大額消費才用卡的朋友。

方案三：割引戲院 / 場次

大家都知睇首輪電影最平方法係睇早場，以百老匯院線為例，早場最平 $55有交易。不過除非你係退休人士或容易走堂的大專生，否則一般上班族都好難為睇場戲特別請假兼早起身。不過還有一些戲院及場次，可以提供平價選擇。

近年戲院又成為大型商場必備的設施，競爭日趨激烈下，部分並非位處一線旺區的戲院如荃灣愉景新城Candy Park by Cinema City，早前就推出全天候尾場優惠，成人票價$75。位處荔枝角工貿區的MCL長沙灣戲院，亦以平價吸引人流，2D電影成人票價只需 $45，3D電影成人票價亦只係 $65。其實戲院所在麗新商業中心，周邊都有唔少平價飲食選擇，唔介意睇完戲行街要轉區的話，搭車過來睇戲都不失為特別又慳錢的體驗。

各院線優惠比一比