雅虎香港財經 【大茶飯】北水大數據與細節位（青冰）
一如市場所料，MSCI將在未來三季增加A股在新興市場指數的比重，有分析已經計到將帶動數千億的外資經港股通流入A股，這些’南水對A股市場影響有幾大，暫時大家都係斷估，不需太high，去年MSCI更是首次納入A股添，結果A股在2018年係跌到反艇的。
南水要買乜，跟住MSCI個list就知啦，北水就反而愈來愈少人談及，坊間唔少人都認為，北水影響力已大不如前，睇現時流出多過流入就知啦，更有指下個牛市，相信要持續見到北水流入，才可確認，至於係唔係，青冰先給你一點數據去睇下。
踏入2019年，上海那邊在1月及2月錄得凈流出36億及14億，深圳那邊就錄得凈流入3000萬及凈流入48億，兩邊加埋淨流出1億零，睇大數就似乎確認北水對港股興趣不大，但留意恆指及國指今年累升11%及13%，究竟個市係被外資買起咗，定係大家沒有看清細節呢？資金換馬炒，似乎才是近月北水的主調，這個情況在2月更明顯，建行(0939)、騰訊(0700)及工行(1398)被北水沽了127億元，但你睇大數，2月係凈流入34億啊，咁啲錢去咗邊呢，北水2月買較狠的是中信證券(6030)11億，吉利(0175)16億及中人壽(2628)14億，以上數字都只係根據港交所月結數字的十大成交，換言之冇入十大的，流入的資金可能已經煲起了一些股份。
當大家都聚焦新的港股通名單將於3月11日更新，但福萊特玻璃(6865)就在3月1日率先加入咗深港股標的，深交所公佈因應佢嘅A股已經上市滿十日，將H股調入港股通名單，結果股價單日急升23%，北水全日凈買入7900萬元，佔全日總成交的67%。究竟北水是否要長期流入買起個市，才算是舉足輕重，還是切實地捉到個股目標，相信戰友一定知道答案。
玩開大股的戰友，福萊特玻璃這些股未必會留意，但今年表現好省鏡的中人壽，少有地大幅跑贏平保(2318)，究竟有冇北水手影呢？翻查CCASS數字，滬港股在12月底持有9900萬股中人壽，截至2月底已經增至1.9億股，今年累升37%，是恆指成份股升幅首位。
大數據真係好易搵好易入腦，但見到北水不再大量流入就偷懶不看細節，結果就是會錯失良機吧。
