【大茶飯】北水愛吃小龍蝦(青冰)
早幾星期冇乜人講的A股入摩,開始炒熱,好在青冰早前在另一專欄提醒過大家,如果有跟住撈咗港交所(0388),已經坐住十蚊利潤,無論之後係大時代2.0定係藍燈籠最後一升,現時都可以袋住錢吃花生,兩年前港交所八個交易日就由178蚊升到300蚊,今次大家都好有戒心,大部分戰友,包括青冰自己,都唔信會上到300囉,但事實係,即使大家唔信,未必唔會發生嘅,操盤永遠都係順勢而行,唔去追貨,都唔好咁快食糊,最忌自以為醒過人,一早走去沽佢,挾多兩挾失咗方寸,最後真係跌市你都賺唔到。
大牛市唔知係咪已到來,但夏天真的來了。要消暑,香港人會飲下啤酒,食花生,食啲熱氣野,原來內地人飲啤酒,係會鍾意食滷水食品,非常重口味,仲要食鴨脖,喂咪住先,青冰自細都被訓練,家禽永遠都不能吃頸喎,怕打咗激素,但同胞就是愛吃,國內三大知名滷店,煌上煌、絕味及周黑鴨(1458),全部都有上市,成為一個鴨脖板塊。
早前在4月曾品題過周黑鴨,雖然入摩不成,但佢地5月有新搞作,就係聚一蝦,即係小龍蝦,根據美團點評數據,全年銷售額過千億,全國有近兩萬家小龍蝦專門店,最頂癮嘅係,上月正式推出時,仲搞咗個發佈會,主席周富裕直頭Steve Jobs上身,在台上介紹呢隻蝦。
由於香港人真係唔食鴨脖同小龍蝦,好難會覺得周黑鴨有可為,但北水並唔係咁諗,自從3月加入港股通至今,滬深兩地投資者共持有4.4%股本,錄得淨流出的日子不夠十個交易日,主席夫婦揸住62%,創投基金天圖持7.7%,加上一些老員工持有的股份,街貨都算疏,若然北水繼續食住鴨蝦買股票,隨時俾佢地買乾晒,小龍蝦今星期就滿月,話唔定公司會有靚數公佈,現價回到去8.28,非常值搏,戰友乞可以跟進。