雅虎香港財經 【大茶飯】千億匯控為避險？（青冰）
平保(2318)旗下資產管理公司公佈，11月1日增持537萬股匯控(0005)，股權增至7.01%，正式成為最大股東，雖然這個已屬舊聞，但當青冰再爬吓數據，又有更多有趣的發現。
平保對上兩次申報，是在17年12月及今年2月，12月時係首次披露持股多於5%，而2月時是申報持股剛超過6%，而今次就係申報剛超過7%。股權披露算係幾複雜的課題，青冰都係今年先細閱過有關指引，有興趣的戰友可到證監會網頁睇吓，在平保而言，佢是不需每次增持都申報的，每次超過1%才需要，所以你會睇到佢11月1日申報在增持前是6.98%，而不是2月申報時的6.17%。
今次的申報是在11月5日收市後，符合相關規定的3個營業日內，而買貨亦應該大部分在11月1日在場內做的，因為平均價係65.1153元，最高成交價係65.40元，你睇返匯控股價在10月16日時跌穿65蚊，之後到11月1日先重上此水平，點解話大部分呢，係因為佢可以在10月31日及11月1日都買貨，而在11月5日先申報，都唔會犯規，翻查港股通在這兩天的記錄，分別是錄得3.1億元及3.5億元的凈流入，而該申報的交易就係約3.49億元，咁斷估都唔會係11月1日一天內掃晒嘅。
講返北水，按CCASS的資料顯示，在11月1日，經滬港通持有匯控的股權，是7.20%，而經深港通的只有0.04%，咁唔使問都知平保用邊一個啦，而更有趣的是，平保申報持有7.01%，同7.20%相比，即係佔了97%都係平保嘅，咁即係除咗平保這位超強大媽之外，係冇乜北水對匯控有興趣。這個結論青冰都唔敢講得太肯定，因為平保話港股投資大部分都係經港股通，當中匯控持股會唔會100%都用港股通呢？相信平保唔會去證實，而我們亦較難得知。截至11月7日的最新數字，滬港通持有匯控已有7.32%，咁大家又可以留意CCASS，超越8%股權後，平保是否在3日內申報，就可推測到平保是否全用港股通揸貨了。
平保副首席執行官話，無意派人入匯控的董事局，因為看好長期的分紅。以CCASS估計，他們持股約14億股，貨值近950億港元，佢哋成本係幾多相當難計，但可以從滬股通CCASS作推測，16年5月至9月間瘋狂增持5億股，當時股價係47至59元，有超過三分之一貨底係呢啲位開始買，相信現價應該唔使蝕，加上匯控每年有近4蚊息，息率keep到有6厘，對平保來說都唔錯呀，再講，呢一千億貨係港元嘛，人仔兌港元今年都貶了6%，揸匯控直頭係曲線避險呀。
