【大茶飯】坐著龍光等通車（青冰）

近日又有消息指，港珠澳大橋會在5月通車，由於大橋係大灣區規劃的重要環節，所以在宣佈規劃時落實通車日子，順理成章，以此推算，最遲2、3月規劃應會出台。

恆指連升十四日破晒記錄，但原來日股試過16連升，而納指更加試過19連升，真係一山還有一山高。現在股市牛氣沖天，升勢亦已較去年全面，唔係只側重騰訊（0700.hk）及平保（2318.hk），去年火爆的手機、汽車及內房，暫時前兩者有熄火的跡象，只有內房在今年仍有餘威，唔少股份再創新高。

唔少內房都屬孭住重債，今明兩年會係還債高峰期，換言之配股抽水的機會頗高，但內房陸續公佈的全年銷售額，又真係好鬼勁，亦即係話，黎緊盈喜必發，3月的業績潮肯定靚仔，有理由相信，屆時先會係抽水的最佳時機。

又要威又要戴頭盔，如果要揀隻值搏的內房，青冰會揀有多啲概念的，例如大灣區。可能近期大家炒到興烚烚，未必有留意港澳辦主任張曉明，在12月底講過，大灣區發展規劃即將出台，而近日又有消息指，港珠澳大橋會在5月通車，由於大橋係大灣區規劃的重要環節，所以在宣佈規劃時落實通車日子，順理成章，以此推算，最遲2、3月規劃應會出台。

龍光地產（3380.hk）在大灣區的土儲，佔公司全部的66%，加上唔少係早期買入的，所以如果要炒大灣概念，龍光肯定受惠，佢地在去年10月開始回購，價位在6.7至7.98，咁現價只係高咗一成，值搏率亦高，唯一擔心嘅係，去年9月傳過會在9.50左右配股，不過亦有傳配股在啟動後突然取消，公司最後發通告指配股傳聞失實，或許是這個前因，那個「配股價」成為了心理阻力，即使內房股在今年咁強勁，龍光仍然未創新高。

作為火熱板塊的落後股，只要有大橋或大灣區的傳聞，相信可以輕易引來資金換馬，破頂唔係問題，9蚊樓下收集，坐定定等消息吧。

Fb個人專頁 http://www.fb.com/chingbing888