雅虎香港財經 【大茶飯】外賣仔有冇作為？（青冰）
昨天看到報章一個財經專題，話外賣app的出現，打救了不少餐廳，很多小店因而只租細舖位專做外賣生意，而最令青冰驚訝的，原來這個趨勢在內地及美國盛行，按報導，美團(3690)及阿里巴巴旗下的餓了麼，嚴重打擊了康師傅(0322)的即食麵銷量。
青冰一家都算係袋鼠幫外賣app的忠實支持者，一個月都幫襯四、五次，開頭因為懶落街食，老婆亦無時間煮到咁多日晚餐，所以最熱門的三個外賣app也有用過，唔詳細分析那個app較佳，只是袋鼠內的餐廳係比較啱口味，唔知係咪跟所住的區域有關呢。這間公司在英國開業，現時已在十幾個國家有業務，傳在11月再作融資，公司估值已達40億美元，或會在2020年上市。
在顧客的角度，青冰幾滿意佢地的服務，在香港咁貴舖租的情況下，有時行入間餐廳度食，都會喺度諗，都唔知有幾多%的成本，係真正放在食材裡面，而最終食落肚，所以這些app在香港應有作為，不過要青冰等45分鐘已經係極限，如果在外國城市，唔知個送餐時間要幾耐呢？各戰友可在fb專頁分享一下。
內地美團及餓了麼打擊了康師傅的生意，不過似乎冇乜產生獲利機會，康師傅去年跌了33%，跌勢主要集中在9月後，在此之前都係一隻非常穩的大價股，在世界盃前後更有憧憬業務會受惠，創過3年新高，11月公佈第三季度業績，遠遜預期而令股價暴跌18%，不過佢冇乜場內衍生工具可炒，做淡無門。好喇，當啲生意畀美團搶晒，但二千幾億市值並無盈利，9月上市至今已累跌36%，唔見得呢隻股買得落手啊。
究竟外賣app這個大趨勢，會否引延到打擊本地傳統飲食股呢？大快活(0052)的長升神話由03年開始，由1蚊升到16年的40蚊，大家樂(0341)亦由03年的5蚊升到15年的30蚊，早大快活一年見頂，不過兩股在近兩年都係積弱，轉而用特別息息誘投資者，業務唔得，都係老掉牙的原因，人工貴租金貴，成本逐漸轉嫁畀顧客，即係話愈來愈貴，性價比無以前咁高，青冰不如幫襯多啲小店或外賣app好過啦，戰友點睇？
