【大茶飯】大班胡生鬥快派息(青冰)
12月初個市跌到爛晒的時候提及和電(0215),並不是甚麼早著先鞭的推介,因為公司出售固網業務收番145億元,在7月公佈,10月完成交易,比青冰更早講此股的文章肯定唔少,內容亦應大同小異,在上月市況甚差時和電竟然從低位回升,成交增加,咁啱又記起霍大班話派唔派息要睇12月開會,所以就覺得值搏,咁之後幾個星期,見到好多專欄及網上節目推介,股價又升到去3.26,真係好似今天收市就會派咁嘅款。
提番大家一樣野,呢隻股在7月正式落實賣業務前,一度試過兩次急升,結果都係流料,最後一震出現於正式公佈前兩日,隊到去2.74先至反彈。戰友亦提醒當日長實(1113)在賣中環中心前,傳過N次,耐唔耐都會炒下,但次次都落空。換言之,想做霍大班(或誠哥)世界做春江鴨,似乎唔會成功。好喇12月已成過去,未見有派息的通告,但上星期都有一份確定最後交易價的通告,仲收多幾千萬添。和電每年慣性在2月尾公佈業績,可以視為deadline,電能(0006)上年都係在業績前幾星期突擊話派息,和電會唔會有樣學樣,需要多一點耐性去等,如果唔等得,先行獲利亦冇問題,相信呢個位沽貨應該冇人要輸錢啦。
合和(0054)假期前公佈出售合和公路(0737)全部股權,將獲特殊盈利49億,胡應湘話唔係撤資,只係配合地方政府的要求,甚有為國捐軀的味道,至於收近百億現金會點運用,管理層話特別息要留待1月公司發出通函時再公佈喎,提番大家,胡氏家族現時持股只有28%,基金反而揸唔少,所以即使收息胡生都唔係收好多架。當佢啲錢還清債項,長債12億短債11億,仲有75億落袋,折合每股8.63元,實際派幾多大家只能靠估,但去年合和為慶祝上市45周年,都派咗0.45息特別息,斷估今次唔會少過此數。
胡生只揸28%,都決定在通函講派幾多特別息,咁長和(0001)及誠哥共持有73%的和電,霍大班賣完嘢收晒錢,連說好的12月都過埋,仲等乜呢?16年前胡生同大班在興建港珠澳大橋時有過爭論,大班仲叫對方唔好做佢世界添,咁多年後大家頭都白晒,不如鬥快派特別息益小股東吧。
Fb個人專頁 http://www.fb.com/chingbing888