【大茶飯】大股東身體最誠實(青冰)
裕元(0551)大股東寶成宣佈私有化個孫寶勝(3813),每股作價2.03元,較星期五收市價1.54有31.8%溢價,理由係網購令市場競爭加劇,因此公司需要大量投資,之後會影響寶勝的業績表現云云。呢個私有化理由的確似曾相識,去年鞋王藍籌百麗,都係講緊類似嘅野,唔想因迎接未來挑戰而影響到股價表現咁囉。
青冰入行時睇過財經書,總係話私有化係大股東覺得股價長期無法反映公司價值,又或者老細無心戀戰,唔想繼續上市浪費成本了。時而世易,後者發生的機會微了,因為個殼有價,只要你間公司乾乾凈凈,貨源集中,賣咗佢收番十億八億,總好過從自己荷包拎錢出來私有化吧。
百麗及寶勝都係要備戰網購而需要大量資金,或者要重組規劃去打硬仗,既然係咁,集資配股其實係一個容易的方法,但寶勝阿爺話唔需要勞煩小股東喇,呢啲咁冒險要搏又要科水的事,等我自己黎啦,真係非常有承擔的大股東啊。
私有化價2.03元,比起上月低位1.05元高咗93%,好似好吸引,上年嘅呢個時候,股價就係從2.2元開始跳水,原來係公司發現CFO將假銷售入賬,消息公佈後翌日股價低見1.30元。咁上月個低位又點黎架呢,就係寶勝公佈Q3業績,非常曳,仲拖累埋裕元單日急跌半成,跟手幾間大行都下調寶勝評級,目標價最低見1蚊。青冰真心冇跟開呢隻股,但近年高位係2016年的2.84元,個私有化只係低28%,若然個前景真係咁差,咁只能再嘆一句,大股東真係菩薩心腸。
裕元在11月被寶勝拖累,股價隊咗幾日,而公司亦動用1200萬元回購咗兩日,係自08年海嘯以來首次,今次出手位亦相當準確,約28蚊,買完即見底,今次私有化裕元會收到67億元,按通告所指會「幾乎全部」用作派一次性特別息,約每股4蚊。現時如果重組案情,似乎就明白為何寶勝Q3業績咁差,及裕元為何9年來首度回購,所以大股東的身體永遠比把口誠實的。