雅虎香港財經 【大茶飯】宅男剖析IGG（青冰）
各位宅男，你地細個有冇打過足球小將呢？青冰當日就相當迷戀，費寢忘餐，仲要對住一大堆日文字，那些年冇互聯網，一切都係靠一本攻略同靠估，最弊就係唔知邊個日本仔發明，儲存進度係要手抄日文，一個小學生點抄咁多符號呢？稍一不慎抄錯咗，又要從之前的進度再來，非常懊惱。近日佢地終於登陸手遊了，不過又係日本appstore先有，要開個日本itunes戶口再下載，仲要全日文應戰，今時不同往日，青冰寧願花點時間研究股票，也不想為打機費神估日文。
青冰自問手腳笨拙，所以喜歡打策略遊戲多於其他，若現時要去打騰訊(0700)的「王者榮耀」，肯定慘敗而回，反而IGG(0799)的「王國紀元」，應有力一戰。還記得青冰在去年底，率先推介當時死氣沉沉的IGG，王國紀元正值初起，但月流水已經非常強勁，然而市場仍是低估，最後掃除了策略股東IDG的貨源，再配合港股通，升到阿媽都唔認得。
半年升咗一倍，IGG仲值得買嗎？讓青冰今次以遊戲的角度入手。王國紀元的規劃不錯，免費玩家只要有耐心，都可以打得唔錯，呢個有助遊戲的耐玩性，講真，完全靠課金玩家，隻game只係搵快錢，唔會長久。另一方面，王國紀元係全球同服，你身在中國，都可以同世界各地玩家一較高下，不要小看這個設定，現實生活的一些國家情仇，會令大家更上心的戰鬥，若然你玩過手遊，一定知谷戰盟戰係幾咁重要，亦都係玩家最樂意燒錢提升自己的實力，日後有國家戰的話，肯定流水急增。
王國紀元5月流水有3900萬美元，比上月增加3百萬，現時有三分一收入來自內地，而遊戲將於今年殺入Android平台，是為亮點，5、6月係考試季節，應屬淡季，若6月流水再按月增長，踏入暑假就更加不得了，有戰友計過現價係反映緊今年10倍市盈率，估值唔貴，試問科網股中有邊隻似IGG透明度咁高，假數機會極低，仲要有2至3厘息派，如果股價再跟科網股回吐，建議戰友逢低吸納。
