【大茶飯】平保懷著金叵羅(青冰)
戰友將為人父,青冰在此祝願嫂子一切順利,誕下活潑麟兒。 青冰去年亦初為人父,深明嗰種期待及喜悅, 有很多東西要添置同準備,總括來說都係「未出世,先興奮」, 至於初生後的挑戰及辛勞,已是後話。有一隻藍籌股, 其實已進入咗相同的階段,懷胎多時,準備好橫空出世,劍指本年, 講緊嘅就係平保(2318)。
內地網絡金融,你可能只會想到阿里的螞蟻金服,騰訊(0700) 的微信支付,也是朝著先支付寶後金融服務的方向發展, 但平保旗下的陸金所,經過幾次重組,已經變成集銀行、信託、 證券、保險、公私募基金於一身的金融服務公司。 由於平保本身咩牌照都有,品牌靚仔,要孕育陸金所成長, 實是易事,就以平保季績所披露,現時註冊用戶達3013萬, 活躍戶有765萬,首季度交易量,零售客有5594億,機構則有 13839億。
篇幅所限,青冰唔再詳述佢廣泛的業務及成績,直接講上市吧。 內地企業上市,通常都會做幾輪融資,引入機構投資者, 陸金所已經做了兩輪,分別引入鼎暉、BlackPinePriv ate、中金私募、國泰君安、中銀集團及民生商銀國際, 真係中港外資都有。不過平保的股東係吃虧咗, 經過幾次的融資及重組,平保持股由成立時的75%,減至44%, 不過管理層持有26%,仍掌控股權。
陸金所CEO在3月接受彭博訪問,話已經為IPO做好準備, 目前只等適當時機,上市地點可能是香港。而內地的消息指, 四間投行已埋位,大摩、花旗、美銀及中信證券,而陸金所將發行1 0%股份,集資不低於50億美元,嘩,換言之,估值達500億美 元,咁平保揸住嘅就值200億美元,肚裡原來陀住金叵羅!
平保上周創22個月新高,亦即係大時代爆破後的高位, 是中資金融股中走勢最強,暫時未見明顯的消息浮面支持, 係純炒落後,還是「未上市,先興奮」? 螞蟻金服今年上唔到市,搶飲頭啖湯,此其時也。